«ក្រលៀន» ឬតម្រងនោម គឺជាសរីរាង្គដ៏សំខាន់បំផុតមួយ ដែលធ្វើការយ៉ាងស្ងៀមស្ងាត់ជារៀងរាល់ថ្ងៃ ដើម្បីចម្រោះកាកសំណល់ បន្សុតឈាម និងរក្សាតុល្យភាពទឹកនៅក្នុងរាងកាយ។ អ្វីដែលគួរឱ្យភ័យខ្លាចបំផុតនោះគឺ ជំងឺក្រលៀនជាច្រើនប្រភេទមិនសូវបញ្ចេញរោគសញ្ញាឱ្យយើងដឹងមុននោះទេ លុះត្រាតែវាឈានដល់ដំណាក់កាលធ្ងន់ធ្ងរទៅហើយ។
មនុស្សភាគច្រើនមិនបានដឹងទេថា ទម្លាប់រស់នៅប្រចាំថ្ងៃមួយចំនួន កំពុងតែដាក់សម្ពាធ និងបំផ្លាញសរីរាង្គមួយនេះបន្តិចម្តងៗ។ ខាងក្រោមនេះជាទម្លាប់អាក្រក់ ៥ យ៉ាង ដែលអ្នកគួរតែប្រញាប់កែប្រែជាបន្ទាន់ បើមិនចង់ឱ្យក្រលៀនចុះខ្សោយមុនអាយុ៖
១. ការផឹកទឹកតិចពេក (មិនគ្រប់គ្រាន់តាមតម្រូវការ)
តួនាទីចម្បងរបស់ក្រលៀនគឺការចម្រោះជាតិពុល។ នៅពេលដែលអ្នកមិនបានផឹកទឹកគ្រប់គ្រាន់ ក្រលៀនខ្វះជាតិទឹកក្នុងការរុញច្រាន និងបង្ហូរជាតិពុលទាំងនោះចេញមកក្រៅ តាមរយៈទឹកនោម។ កាលណាកាកសំណល់ និងជាតិពុលទាំងនោះកកកុញនៅក្នុងខ្លួន វានឹងធ្វើឱ្យឈាមឡើងខាប់ និងបង្កើតទៅជាគ្រួសក្នុងក្រលៀន ដែលជាដើមហេតុនាំឱ្យរលាក និងខូចក្រលៀន។
-ដំបូន្មាន៖ គួរផឹកទឹកស្អាតឱ្យបាន ២ ទៅលីត្រក្នុងមួយថ្ងៃ (អាស្រ័យលើសកម្មភាពប្រចាំថ្ងៃ)។
២. ទម្លាប់ញ៉ាំប្រៃខ្លាំង (សូដ្យូមខ្ពស់)
អាហារដែលមានរសជាតិប្រៃ មានផ្ទុកនូវជាតិសូដ្យូមខ្ពស់។ នៅពេលដែលយើងញ៉ាំប្រៃពេក រាងកាយត្រូវរក្សាទឹកទុកកាន់តែច្រើន ដែលធ្វើឱ្យសម្ពាធឈាមកើនឡើង។ សម្ពាធឈាមខ្ពស់ គឺជាសត្រូវលំដាប់ដំបូងដែលចូលទៅបំផ្លាញសរសៃឈាមតូចៗនៅក្នុងក្រលៀន ធ្វើឱ្យសមត្ថភាពចម្រោះរបស់វាចុះខ្សោយទៅៗ។
-ដំបូន្មាន៖ កាត់បន្ថយការថែមទឹកត្រី ទឹកស៊ីអ៊ីវ ប៊ីចេង និងជៀសវាងអាហារផ្អាប់ ឬនំកញ្ចប់កែច្នៃ។
៣. ទម្លាប់ «ទប់នោម» យូរៗ
ការទប់នោមដោយសារតែរវល់ការងារ ឬជិះឡានផ្លូវឆ្ងាយ ហាក់ដូចជារឿងធម្មតា ប៉ុន្តែវាជាគ្រោះថ្នាក់ដ៏ធំសម្រាប់តម្រងនោម។ ការទុកទឹកនោមនៅក្នុងប្លោកនោមយូរពេក ធ្វើឱ្យបាក់តេរីកកើត និងរីករាលដាលយ៉ាងលឿន ដែលបង្កឱ្យមានការរលាកផ្លូវទឹកនោម (UTI)។ ប្រសិនបើការរលាកនេះកើតឡើងញឹកញាប់ បាក់តេរីអាចរត់បញ្ច្រាសឡើងទៅលើ និងបង្កការចង្រ្គានមេរោគដល់ក្រលៀនផ្ទាល់តែម្តង។
៤. ការប្រើប្រាស់ថ្នាំបំបាត់ការឈឺចាប់ផ្តេសផ្តាស
មនុស្សជាច្រើនឱ្យតែមានអាការៈឈឺក្បាល ឈឺសាច់ដុំ ឬឈឺសន្លាក់ តែងតែរត់ទៅទិញថ្នាំលេបដោយខ្លួនឯង ដោយគ្មានវេជ្ជបញ្ជា។ ថ្នាំបំបាត់ការឈឺចាប់ក្នុងក្រុម NSAIDs (ដូចជា Ibuprofen, Naproxen ឬថ្នាំសន្លាក់មួយចំនួន) មានឥទ្ធិពលកាត់បន្ថយលំហូរឈាមដែលរត់ទៅចិញ្ចឹមក្រលៀន។ ការលេបថ្នាំទាំងនេះក្នុងកម្រិតខ្ពស់ ឬប្រើប្រាស់វាជាប្រចាំ នឹងធ្វើឱ្យក្រលៀនខូចខាតយ៉ាងធ្ងន់ធ្ងរ។
៥. ការញ៉ាំគ្រឿងស្រវឹង និងភេសជ្ជៈផ្អែមខ្លាំងហួសប្រមាណ
គ្រឿងស្រវឹងធ្វើឱ្យរាងកាយបាត់បង់ជាតិទឹកយ៉ាងលឿន និងរំខានដល់មុខងារគ្រប់គ្រងជាតិទឹករបស់ក្រលៀន។ ចំណែកឯភេសជ្ជៈផ្អែមៗ ឬតែទឹកដោះគោវិញ សម្បូរទៅដោយជាតិស្ករ Fructose ដែលជម្រុញឱ្យអាស៊ីតអ៊ុយរិក (Uric Acid) ក្នុងឈាមកើនឡើង ដែលបង្កជាគ្រួសក្នុងតម្រងនោម និងបង្កើនហានិភ័យនៃជំងឺទឹកនោមផ្អែម ដែលជាមូលហេតុចម្បងនៃជំងឺខ្សោយក្រលៀន។
+ សញ្ញាព្រមានដែលមិនគួរមើលរំលង៖ ប្រសិនបើអ្នកចាប់ផ្តើមមានអាការៈដូចជា៖ ទឹកនោមមានពពុះច្រើន, នោមញឹកញាប់នៅពេលយប់, ហើមជើង ឬហើមជុំវិញភ្នែក, និងអស់កម្លាំងល្ហិតល្ហៃខុសធម្មតា នោះអាចជាសញ្ញាថា ក្រលៀនរបស់អ្នកកំពុងតែស្រែកហៅឱ្យជួយហើយ។
«ក្រលៀនគ្មានគ្រឿងបន្លាស់ងាយៗដូចសម្ភារៈនិយមនោះទេ។ ការស្រឡាញ់ខ្លួនឯង ត្រូវផ្តើមចេញពីការស្រឡាញ់ និងការពារសរីរាង្គខាងក្នុងរបស់អ្នកចាប់ពីថ្ងៃនេះតទៅ!»