យោងតាមការចុះផ្សាយពីប្រភពបរទេស ការសិក្សាថ្មីពីសាលាវេជ្ជសាស្ត្រនៃសាកលវិទ្យាល័យ Yale បានរកឃើញថា ប្រភេទនៃខ្លាញ់មានឥទ្ធិពលខុសៗគ្នាយ៉ាងខ្លាំងទៅលើជំងឺមហារីកលំពែង ដែលជាប្រភេទមហារីកដ៏គ្រោះថ្នាក់បំផុតមួយ។
លទ្ធផលពិសោធន៍បានបង្ហាញថា របបអាហារសម្បូរទៅដោយអាស៊ីតខ្លាញ់មិនឆ្អែតច្រើន (PUFA) មិនត្រឹមតែមិនបង្កគ្រោះថ្នាក់ប៉ុណ្ណោះទេ ប៉ុន្តែថែមទាំងអាចជួយពន្យឺតការលូតលាស់នៃដុំសាច់ និងកាត់បន្ថយហានិភ័យនៃជំងឺមហារីកលំពែងបានដល់ទៅ ៥០% ទៀតផង។ ប្រភពអាហារដែលសម្បូរទៅដោយ PUFA រួមមាន ត្រីខ្លាញ់ (ត្រីសាល់ម៉ុន ត្រីស្មេក ត្រីសាឌីន) ប្រេងសណ្តែកសៀង ប្រេងល្ង ប្រេងផ្កាឈូករ័ត្ន និងគ្រាប់ធញ្ញជាតិមួយចំនួន។ ផ្ទុយទៅវិញ ការសិក្សានេះបានរកឃើញភាពភ្ញាក់ផ្អើលមួយចំពោះអាស៊ីតខ្លាញ់មិនឆ្អែតមួយ (MUFA) ដែលមាននៅក្នុងប្រេងអូលីវ សណ្តែកដី ផ្លែបឺរ និងខ្លាញ់ជ្រូក។
ទោះបីជា MUFA ត្រូវបានគេស្គាល់ថាផ្តល់ប្រយោជន៍ដល់សុខភាពបេះដូងក៏ដោយ ប៉ុន្តែការសិក្សានេះបង្ហាញថាវាអាចជំរុញយ៉ាងខ្លាំងដល់ការលូតលាស់នៃដុំសាច់ចំពោះអ្នកដែលមានហានិភ័យហ្សែននៃជំងឺមហារីកលំពែង។
ការរកឃើញនេះគឺជាជំហានដ៏សំខាន់មួយសម្រាប់វិទ្យាសាស្ត្រក្នុងការរៀបចំយុទ្ធសាស្ត្ររបបអាហារជាក់លាក់ ដើម្បីការពារក្រុមមនុស្សដែលមានហានិភ័យខ្ពស់ ព្រោះថាជំងឺមហារីកលំពែងនៅតែជាបញ្ហាពិបាកដោះស្រាយបំផុតក្នុងវិស័យវេជ្ជសាស្ត្របច្ចុប្បន្ន៕