យោងតាមការចុះផ្សាយពីប្រភពបរទេស ឪពុកម្តាយជាច្រើនតែងតែយល់ថាការទូន្មាន ឬការត្រួតពិនិត្យរបស់ខ្លួនគឺជាការល្អសម្រាប់កូន ប៉ុន្តែជាក់ស្តែងទម្លាប់មួយចំនួនបែរជាក្លាយជាបន្ទុកផ្លូវចិត្តធ្ងន់ធ្ងរ។
ការរអ៊ូរទាំដដែលៗមិនឈប់ឈរធ្វើឱ្យកូនៗជ្រើសរើសវិធីមិនស្តាប់ ឬក្លាយជារឹងរូស ខណៈពេលដែលការស្តីបន្ទោសរឿងកំប៉ិកកំប៉ុក និងការទាមទារខ្ពស់ហួសហេតុធ្វើឱ្យកូនបាត់បង់ទំនុកចិត្ត និងរស់នៅដោយសម្ពាធជានិច្ច។ ក្រៅពីនេះ ការមិនទទួលស្គាល់ ឬការបដិសេធអារម្មណ៍របស់កូននៅពេលពួកគេយំឬខឹង នឹងធ្វើឱ្យក្មេងបាត់បង់សមត្ថភាពគ្រប់គ្រងអារម្មណ៍ខ្លួនឯងនៅពេលធំឡើង ហើយការបង្ខំឱ្យកូនធំឡើងមុនអាយុដើម្បីរ៉ាប់រងបញ្ហារបស់មនុស្សធំ ក៏ធ្វើឱ្យពួកគេបាត់បង់ភាពជាកុមារភាពផងដែរ។
ដើម្បីកសាងបរិយាកាសគ្រួសារឱ្យមានសុខភាពល្អ ឪពុកម្តាយគួររៀនកាត់បន្ថយការរអ៊ូ ការអត់ធ្មត់រង់ចាំកូនកែប្រែ ការទទួលស្គាល់អារម្មណ៍កូន និងអនុញ្ញាតឱ្យពួកគេរស់នៅតាមវ័យរបស់ពួកគេដោយភាពកក់ក្តៅ៕