យោងតាមការចុះផ្សាយពីប្រភពបរទេស អ្នកជំនាញផ្នែកសុវត្ថិភាពចំណីអាហារ បានគូសបញ្ជាក់ថា មិនគួរមានការវាយតម្លៃជ្រុលហួសហេតុថាខ្លាញ់ជ្រូកជាអាហារបំប៉នកំពូលនោះទេ។
គ្រប់ប្រភេទខ្លាញ់ទាំងខ្លាញ់សត្វ និងប្រេងរុក្ខជាតិ សុទ្ធតែមានសមាសធាតុផ្សេងៗគ្នាដែលផ្តល់រសជាតិប្លែកៗដល់ម្ហូបអាហារ ហើយវីតាមីនដែលរលាយក្នុងខ្លាញ់ក៏អាចទទួលបានពីបន្លែ ផ្លែឈើ ស៊ុត និងសាច់ត្រីផងដែរ។ បញ្ហាពិតប្រាកដមិនមែនស្ថិតនៅលើប្រភេទខ្លាញ់នោះទេ ប៉ុន្តែគឺសីតុណ្ហភាពនៃការចម្អិន ដោយសារការចៀនឆានៅកម្ដៅខ្ពស់ខ្លាំងធ្វើឱ្យខ្លាញ់បែកនិងបញ្ចេញសារធាតុពុលដែលបង្កហានិភ័យដល់សុខភាព។
ដើម្បីសុខភាពល្អ អ្នកជំនាញបានណែនាំឱ្យចេះប្រើប្រាស់ខ្លាញ់ឱ្យត្រឹមត្រូវតាមប្រភេទម្ហូប ដោយការប្រើខ្លាញ់ជ្រូកក្នុងកម្រិតមធ្យមសម្រាប់ចៀនឆា ឬប្រើប្រេងចម្អិនអាហារដែលចម្រុះរួចដើម្បីទ្រាំទ្រនឹងកម្ដៅបានខ្ពស់។ ចំពោះប្រេងអូលីវ វាត្រូវបានចាត់ទុកជាជម្រើសដ៏ល្អសម្រាប់សុខភាពបេះដូង ដោយឡែកកុមារគួរទទួលបានខ្លាញ់ពីត្រីច្រើនជាង។
ជាចុងក្រោយ ការមានរបបអាហារចម្រុះ និងតុល្យភាព គឺសំខាន់ជាងការផ្ដោតលើអាហារតែមួយមុខ ឬការលើកតម្កើងខ្លាញ់ជ្រូកហួសពីការពិត៕