យោងតាមការចុះផ្សាយពីប្រភពបរទេស អ្នកជំងឺទឹកនោមផ្អែមមិនចាំបាច់តមផ្លែឈើទាំងស្រុងនោះទេ ប៉ុន្តែត្រូវប្រុងប្រយ័ត្នខ្ពស់ចំពោះក្រុមផ្លែឈើ ៤ ប្រភេទ រួមមាន ផ្លែឈើតំបន់ក្តៅមានជាតិស្ករខ្ពស់ ដូចជាទុរេន គូលែន និងមៀន ទឹកផ្លែឈើកិនឬច្របាច់ដែលគ្មានជាតិសរសៃ ផ្លែឈើក្រៀមឬដំណាប់ដែលមានកំហាប់ស្ករខាប់ និងផ្លែឈើមានជាតិម្សៅខ្ពស់ដូចជាចេកទុំជោរ ព្រោះវាធ្វើឱ្យកម្រិតស្ករក្នុងឈាមហក់ឡើងលឿនបំផុត។
ដើម្បីញ៉ាំដោយសុវត្ថិភាព អ្នកជំងឺគួរអនុវត្តតាមគោលការណ៍ណែនាំរបស់គ្រូពេទ្យ ដោយជ្រើសរើសពេលវេលាញ៉ាំនៅចន្លោះពេលបាយទាំងពីរជើង ឬក្រោយហាត់ប្រាណ (ចៀសវាងពេលពោះទទេ និងក្រោយម៉ោង ៨ យប់) ព្រមទាំងគួរញ៉ាំទន្ទឹមគ្នានឹងអាហារសម្បូរប្រូតេអ៊ីនដូចជាយ៉ាអួមិនផ្អែម ឬគ្រាប់ធញ្ញជាតិ ដើម្បីជួយពន្យឺតការស្រូបយកជាតិស្ករ។
បន្ថែមពីនេះ ត្រូវកម្រិតបរិមាណត្រឹម ២០០ ក្រាមក្នុងមួយថ្ងៃ (បែងចែកជា ២ ទៅ ៣ ដង មិនឱ្យលើសទំហំកណ្តាប់ដៃក្នុងមួយដង) និងគួរងាកមកជ្រើសរើសផ្លែឈើមានជាតិស្ករទាបនិងសម្បូរជាតិសរសៃដូចជា ត្របែក ក្រូចថ្លុង និងប្លូប៊ឺរី ព្រមទាំងធ្វើការវាស់កម្រិតស្ករក្នុងឈាមរយៈពេល ២ ម៉ោងក្រោយញ៉ាំ ដើម្បីតាមដានការឆ្លើយតបនៃរាងកាយខ្លួនឯងផ្ទាល់៕
ការប្រុងប្រយ័ត្ន!
ព័ត៌មាននេះគ្រាន់តែជាចំណេះដឹងទូទៅប៉ុណ្ណោះ។ បើសិនជាអ្នកមានបញ្ហាសុខភាពមិនប្រក្រតីណាមួយ សូមមេត្តាទៅជួបពិគ្រោះជាមួយគ្រូពេទ្យជំនាញ ដើម្បីទទួលបានការធ្វើរោគវិនិច្ឆ័យ និងការព្យាបាលត្រឹមត្រូវ៕