យោងតាមការចុះផ្សាយពីប្រភពបរទេស ការយល់ខុសថាការផឹកទឹកក្រូចឆ្មារក្នុងបរិមាណច្រើនអាចជួយលាងជម្រះជាតិពុលក្នុងរាងកាយ បានធ្វើឱ្យស្ត្រីម្នាក់អាយុ ៣២ឆ្នាំ ធ្លាក់ខ្លួនឈឺដោយសារការផឹកទឹកក្រូចឆ្មារខាប់ៗពី ២ ទៅ ៣កែវ (ជិត ១លីត្រ) ជារៀងរាល់ថ្ងៃ ទាំងពោះទទេ និងក្រោយពេលបាយ អស់រយៈពេល ៦ខែជាប់គ្នា។
តាមការពិនិត្យសុខភាព គ្រូពេទ្យបានរកឃើញថា នាងមានសភាពអតុល្យភាពសារធាតុអេឡិចត្រូឡីត (ប៉ូតាស្យូម និងកាល់ស្យូម) កម្រិតអាស៊ីតក្នុងទឹកនោមឡើងខ្ពស់ ព្រមទាំងមុខងារតម្រងនោមមានសញ្ញាមិនប្រក្រតី ព្រោះតម្រងនោមត្រូវធ្វើការធ្ងន់ធ្ងរក្នុងការរក្សាតុល្យភាពអាស៊ីត-បាស។ ក្រៅពីនេះ ជាតិអាស៊ីតដ៏ខ្លាំងនៅក្នុងទឹកក្រូចឆ្មារ ក៏បានបំផ្លាញស្រទាប់ធ្មេញរបស់នាង ធ្វើឱ្យស្រៀវធ្មេញយ៉ាងខ្លាំងពេលប៉ះជាតិត្រជាក់ ឬជូរ។
អ្នកជំនាញអាហារូបត្ថម្ភបានណែនាំថា ក្រូចឆ្មារមានវីតាមីនសេ និងសារធាតុជំនួយរាងកាយពិតមែន ប៉ុន្តែមិនត្រូវផឹកច្រើនហួសហេតុ ឬផឹកជំនួសទឹកស្អាតឡើយ ជាពិសេសអ្នកមានជំងឺក្រពះ។ វិធីផឹកដែលត្រឹមត្រូវគឺ គួរផឹកក្នុងបរិមាណល្មមត្រឹម ១កែវតូចក្នុងមួយថ្ងៃ ផឹកក្រោយពេលញ៉ាំអាហាររួច និងត្រូវខ្ពុរមាត់សម្អាតដោយទឹកស្អាតភ្លាមៗ ដើម្បីការពារស្រទាប់ធ្មេញ ក៏ដូចជាជៀសវាងការទុកទឹកក្រូចឆ្មារចោលយូរ ព្រោះវាអាចធ្វើឱ្យបាត់បង់គុណភាពវីតាមីន៕