យោងតាមការចុះផ្សាយពីប្រភពបរទេស បាយជាអាហារចម្បងដែលអាចញ៉ាំរស់រវើកជាមួយមុខម្ហូបជាច្រើន ប៉ុន្តែជារឿយៗការដាំបាយដោយប្រើទឹកស្អាតធម្មតាអាចធ្វើឱ្យបាយមានរសជាតិសាប និងមិនសូវឆ្ងាញ់។
ដើម្បីដោះស្រាយបញ្ហានេះ អ្នកជំនាញផ្នែកម្ហូបអាហារជនជាតិអាម៉េរិកបានណែនាំឱ្យប្រើទឹកស៊ុបមាន់ ឬទឹកស៊ុបបន្លែមកដាំបាយជំនួសទឹកធម្មតា ក្នុងសមាមាត្រទឹកស៊ុប ៥០% និងទឹកស្អាត ៥០% ដែលរូបមន្តនេះនឹងជួយបង្កើនភាពដិតដាន ឈ្ងុយឆ្ងាញ់ មិនទ្រលាន់ និងធ្វើឱ្យគ្រាប់បាយទន់ល្មើយគួរឱ្យចង់ញ៉ាំ។
ក្រៅពីការប្រើទឹកស៊ុប អ្នកជំនាញក៏បានចែករំលែកល្បិចបន្ថែមចំនួនពីរទៀតដើម្បីបង្កើនឱជារសបាយ រួមមាន ការលីងអង្ករស្ងួតជាមួយប៊ឺ ឬប្រេងអូលីវបន្តិចមុនពេលចាក់ទឹកដាំ ដើម្បីជំរុញក្លិនឈ្ងុយឈ្ងប់ និងការបន្ថែមគ្រឿងទេសគ្រាប់ ឬស្លឹកឡូរីយេ ចូលទៅក្នុងឆ្នាំងបាយដើម្បីបង្កើតក្លិនប្រហើរស្រទន់។
វិធីសាស្ត្រផ្លាស់ប្ដូរទម្លាប់ដាំបាយដ៏សាមញ្ញ និងសន្សំសំចៃនេះ ត្រូវបានអ្នកមេផ្ទះជាច្រើនទទួលស្គាល់ថាជា «របត់ថ្មី» ដែលអាចកែច្នៃឆ្នាំងបាយធម្មតាៗឱ្យទៅជាម្ហូបបន្ទាប់បន្សំដ៏មានឱជារស និងប្រណីតសម្រាប់រាល់របបអាហារប្រចាំថ្ងៃ៕