យោងតាមការចុះផ្សាយពីប្រភពបរទេស មីកញ្ចប់ជាអាហារពេញនិយមរបស់មនុស្សម្នាក់ៗព្រោះវាមានភាពងាយស្រួល និងរហ័ស ប៉ុន្តែការចម្អិននិងការញ៉ាំមិនត្រឹមត្រូវអាចបង្កគ្រោះថ្នាក់ខ្លាំងដល់កម្រិតជាតិស្ករក្នុងឈាម និងមុខងារតម្រងនោមរបស់អ្នក។
បើតាមការព្រមានរបស់វេជ្ជបណ្ឌិត ជំនាញខាងជំងឺតម្រងនោម បានឱ្យដឹងថា កំហុសឆ្គងដ៏ធំបំផុតដែលមនុស្សភាគច្រើនចូលចិត្តធ្វើ គឺការរំងាស់មីឱ្យឆ្អិនរលួយខ្លាំងពេក ព្រោះនៅពេលដែលជាតិម្សៅនៅក្នុងសរសៃមីត្រូវកម្ដៅយូររហូតដល់រលួយ វានឹងបំប្លែងទៅជាជាតិស្ករយ៉ាងលឿន ដែលធ្វើឱ្យជាតិស្ករក្នុងឈាមហក់ឡើងខ្ពស់ភ្លាមៗក្រោយពេលញ៉ាំ មិនខុសពីការ «ផឹកទឹកស្ករ» នោះឡើយ ដូច្នេះពេលវេលាដែលល្អបំផុតក្នុងការស្រឡែកមីគឺត្រឹមតែ ៣ នាទីគឺគ្រប់គ្រាន់។ ក្រៅពីនេះ ការញ៉ាំមីកញ្ចប់ទទេដោយមិនបន្ថែមបន្លែបៃតង ឬប្រភពប្រូតេអ៊ីនល្អៗដូចជាស៊ុត ឬតៅហ៊ូ គឺជារបៀបញ៉ាំដែលធ្វើឱ្យខ្វះសារធាតុចិញ្ចឹម និងធ្វើឱ្យរាងកាយស្រូបយកជាតិស្ករលឿនពេក។ ជាងនេះទៅទៀត កញ្ចប់ខ្លាញ់ និងគ្រឿងផ្សំនៅក្នុងមី សុទ្ធតែផ្ទុកនូវជាតិខ្លាញ់មិនល្អ និងជាតិអំបិលខ្ពស់បំផុត ដែលគ្រូពេទ្យណែនាំឱ្យកាត់បន្ថយការដាក់កញ្ចប់ខ្លាញ់ឱ្យនៅតិចបំផុត និងគួរញ៉ាំទឹកស៊ុបមីត្រឹមតែពាក់កណ្តាលចានបានហើយ ដើម្បីចៀសវាងការដាក់សម្ពាធខ្លាំងលើតម្រងនោម។
ទម្លាប់គ្រោះថ្នាក់ផ្សេងទៀតដែលគួរដោះដូរចេញ រួមមានការញ៉ាំមីកញ្ចប់ជំនួសបាយរាល់ថ្ងៃ ការបន្ថែមសាច់កែច្នៃ (ដូចជាសាច់ក្រក ឬប្រហិត) ការញ៉ាំមីកញ្ចប់បណ្តើរផឹកទឹកផ្អែមបណ្តើរ និងការញ៉ាំមីម្តងពីរកញ្ចប់ ឬញ៉ាំនៅពេលយប់ជ្រៅ ដែលសុទ្ធសឹងតែជាភ្នាក់ងារបំផ្លាញសុខភាពដោយមិនដឹងខ្លួន៕