យោងតាមការចុះផ្សាយពីប្រភពបរទេស កង្ហារអគ្គិសនីមិនមានសមត្ថភាពបញ្ចុះកម្ដៅក្នុងបន្ទប់ដូចម៉ាស៊ីនត្រជាក់ឡើយ ប៉ុន្តែវាផ្ដោតលើការបង្កើតរបត់ខ្យល់ដើម្បីជួយឱ្យញើសលើស្បែកភាយទៅក្នុងអាកាស បង្កើតអារម្មណ៍ត្រជាក់ដល់រាងកាយ ដូច្នេះប្រសិទ្ធភាពរបស់វាគឺអាស្រ័យទាំងស្រុងលើទីតាំងដាក់។
ការដាក់កង្ហារកៀកជញ្ជាំងឬជ្រុងបន្ទប់ពេក ធ្វើឱ្យខ្វះលំហូរខ្យល់ចូលពីខាងក្រោយ នាំឱ្យកម្លាំងខ្យល់បក់ខ្សោយ ខណៈការដាក់ចំប៉ះជញ្ជាំងក្ដៅ កញ្ចក់ចាំងថ្ងៃ ឬក្បែរឧបករណ៍អគ្គិសនីបញ្ចេញកម្ដៅ (ដូចជាទូទឹកកក ទូរទស្សន៍ និងចង្ក្រានបាយ) នឹងរឹតតែជួយបក់ជញ្ជូនចំហាយក្ដៅឱ្យសាយភាយពេញបន្ទប់យ៉ាងលឿន។ ជាមួយគ្នានេះ ការបើកកង្ហារលេខខ្លាំងបក់ចំខ្លួនក្នុងបន្ទប់បិទជិត គ្រាន់តែជួយឱ្យត្រជាក់មួយភ្លែតប៉ុណ្ណោះ តែយូរទៅវានឹងធ្វើឱ្យខ្យល់ក្ដៅវិលវល់នៅក្នុងបន្ទប់ រីឯការដាក់កង្ហារទាបពេកជាប់បាតផ្ទះ នឹងបក់នាំចំហាយក្ដៅដែលដក់ជាប់នឹងឥដ្ឋរួមទាំងធូលីដីឱ្យហុយឡើងលើ។កំហុសឆ្គងចុងក្រោយគឺការដាក់ខុសទិសដៅបង្អួច ដោយមិនបានទាញយកខ្យល់អាកាសត្រជាក់ពីខាងក្រៅនៅពេលយប់ ឬព្រលឹមស្រាងៗ ដើម្បីបក់បណ្តេញខ្យល់ហប់នៅក្នុងផ្ទះចេញទៅក្រៅ។
ដើម្បីបង្កើនភាពត្រជាក់ អ្នកជំនាញណែនាំឱ្យដាក់កង្ហារឆ្ងាយពីជញ្ជាំងពី ២០ ទៅ ៣០ សង់ទីម៉ែត្រ បើកទ្វារបង្អួចឱ្យមានខ្យល់ចេញចូលទូទាត់គ្នា ជូតសម្អាតស្លាបកង្ហារឱ្យបានញឹកញាប់ និងអាចដាក់ចានទឹកកកនៅខាងមុខកង្ហារដើម្បីជួយបង្កើតចំហាយត្រជាក់បណ្តោះអាសន្ន៕