ថ្លើម គឺជាសរីរាង្គខាងក្នុងដ៏ធំបំផុត និងជា «រោងចក្រគីមី» ប្រចាំរាងកាយ ដែលទទួលបន្ទុកបន្សាបជាតិពុល ស្តុកទុកវីតាមីន និងផលិតសារធាតុសំខាន់ៗសម្រាប់ទ្រទ្រង់ជីវិត។ អ្វីដែលគួរឱ្យបារម្ភគឺ ថ្លើមជាសរីរាង្គដែលអត់ធ្មត់ខ្លាំងណាស់ វាមិនងាយស្រែកឈឺ ឬបញ្ចេញរោគសញ្ញាឱ្យយើងដឹងភ្លាមៗនៅដំណាក់កាលដំបូងឡើយ រហូតដល់គេប្រសិទ្ធនាមវាថាជា «អ្នកលបបំផ្លាញស្ងៀមស្ងាត់»។
ទោះជាយ៉ាងណាក៏ដោយ នៅពេលដែលថ្លើមចាប់ផ្តើមចុះខ្សោយ ឬរងការខូចខាតធ្ងន់ធ្ងរ វានឹងបញ្ជូនសារព្រមានមកខាងក្រៅតាមរយៈ «ស្បែក» របស់អ្នក។ ប្រសិនបើអ្នកសង្កេតឃើញសញ្ញាទាំង ៥ យ៉ាងនេះលេចឡើងនៅលើស្បែក ចូរប្រញាប់ទៅជួបគ្រូពេទ្យជាបន្ទាន់៖
១. ស្បែក និងគ្រាប់ភ្នែកឡើងពណ៌លឿង
នេះគឺជាសញ្ញាបុរាណ និងច្បាស់ក្រឡែតបំផុតដែលបង្ហាញថាថ្លើមមានបញ្ហា។ នៅពេលថ្លើមមិនអាចបំពេញភារកិច្ចបានត្រឹមត្រូវ វានឹងធ្វើឱ្យសារធាតុពណ៌លឿងម្យ៉ាងហៅថា ប៊ីលីរុយប៊ីន (Bilirubin) ដែលកើតចេញពីការបែកបាក់នៃគ្រាប់ឈាមក្រហមចាស់ៗ កើនឡើងខ្ពស់ខុសធម្មតានៅក្នុងឈាម។
-ការកត់សម្គាល់៖ សារធាតុពណ៌លឿងនេះនឹងហូរទៅកកកុញនៅក្រោមស្បែក និងបាតភ្នែក ធ្វើឱ្យភ្នែកសទៅជាលឿង និងស្បែកប្រែពណ៌លឿងខុសពីធម្មជាតិ។
២. រមាស់ស្បែកខ្លាំងខុសធម្មតា និងរ៉ាំរ៉ៃ
មនុស្សជាច្រើនតែងច្រឡំអាការៈរមាស់ស្បែកទៅនឹងជំងឺសើស្បែក ឬការអឡែហ្ស៊ីអាកាសធាតុ។ ប៉ុន្តែ ការរមាស់ដែលបង្កឡើងដោយបញ្ហាថ្លើម មានលក្ខណៈខុសប្លែកពីគេ គឺវាច្រើនតែរមាស់ខ្លាំងនៅបាតដៃ បាតជើង និងរមាស់ជ្រៅទៅខាងក្នុងស្បែក ដោយគ្មានកន្ទួលក្រហមអ្វីឡើយ។
-មូលហេតុ៖ កើតឡើងដោយសារថ្លើមចុះខ្សោយ លែងអាចបញ្ចេញ អំបិលប្រមាត់ (Bile Salts) បានល្អ ធ្វើឱ្យជាតិប្រមាត់ទាំងនោះហូរចូលទៅក្នុងចរន្តឈាម និងទៅកកស្ទះនៅក្រោមសរសៃប្រសាទស្បែក បង្កជាការរមាស់ដែលទប់ទល់មិនបាន។
៣. លេចចេញសរសៃឈាមរាងដូចពីងពាង
ប្រសិនបើអ្នកសង្កេតឃើញមានចំណុចក្រហមតូចៗនៅលើស្បែក ហើយមានសរសៃឈាមល្អិតៗបែកខ្នែងចេញមកក្រៅរាងដូចជើងពីងពាង (ច្រើនតែកើតមាននៅលើផ្ទៃមុខ ក ទ្រូង និងដៃ) នោះវាអាចជាសញ្ញានៃជំងឺថ្លើម។
-មូលហេតុ៖ នៅពេលថ្លើមខូចខាត វាមិនអាចកំទេចអរម៉ូនអ៊ឹស្ត្រូសែន (Estrogen) ដែលលើសក្នុងរាងកាយបានឡើយ។ ការកើនឡើងនៃអរម៉ូននេះ បង្ខំឱ្យសរសៃឈាមតូចៗនៅក្រោមស្បែករីកធំ និងលេចចេញជារូបរាងដូចពីងពាង។
៤. ស្បែកងាយជាំខ្មៅ ឬហូរឈាមមិនឈប់
តើអ្នកឧស្សាហ៍ឃើញមានស្នាមជាំខៀវ ឬខ្មៅនៅលើស្បែកដៃជើង ដោយមិនបានបុកទង្គិចអ្វីខ្លាំងក្លាមែនទេ? នេះអាចជាសញ្ញាព្រមានថាថ្លើមរបស់អ្នកកំពុងរងការរលាក ឬឈានទៅរកការក្រិន។
-មូលហេតុ៖ ថ្លើមមានតួនាទីផលិតប្រូតេអ៊ីនដែលជួយដល់ ការកកឈាម (Clotting Factors)។ កាលណាថ្លើមដំណើរការមិនល្អ រាងកាយនឹងខ្សត់សារធាតុជំនួយការកកឈាម ធ្វើឱ្យសរសៃឈាមងាយបែកធ្លាយ និងបង្កជាស្នាមជាំនៅក្រោមស្បែកបានយ៉ាងងាយ។
៥. ដុះដុំខ្លាញ់ពណ៌លឿងនៅលើស្បែក
ការលេចចេញជាដុំពកតូចៗទន់ៗពណ៌លឿង ឬពណ៌សាច់ នៅលើស្បែកជុំវិញត្របកភ្នែក ជង្គង់ ឬកែងដៃ ក៏ជាសញ្ញាប្រាប់ពីសុខភាពថ្លើមដែរ។
-មូលហេតុ៖ ថ្លើមគឺជាអ្នកគ្រប់គ្រង និងបំប្លែងជាតិខ្លាញ់នៅក្នុងរាងកាយ។ នៅពេលមុខងារថ្លើមធ្លាក់ចុះ វានឹងធ្វើឱ្យកម្រិតកូឡេស្តេរ៉ុល (Cholesterol) ក្នុងឈាមហក់ឡើងខ្ពស់ខ្លាំង ហូរទៅកកកុញបង្កើតជាដុំខ្លាញ់តូចៗនៅលើស្បែក។
វិធីសាស្ត្រថែរក្សា និងសង្គ្រោះថ្លើមទាន់ពេលវេលា៖
ប្រសិនបើបង ឬមនុស្សជុំវិញខ្លួនមានសញ្ញាទាំងនេះ ចូរឈប់បង្អង់យូរ ហើយងាកមកអនុវត្តជំហានទាំងនេះ៖
-ប្រញាប់ទៅជួបគ្រូពេទ្យជំនាញ៖ ដើម្បីធ្វើការពិនិត្យឈាមមើលមុខងារថ្លើម (Liver Function Test) និងអេកូសាស្ត្រមើលទំហំថ្លើម។
-កាត់ផ្ដាច់គ្រឿងស្រវឹង៖ ស្រា គឺជាថ្នាំពុលលេខមួយដែលបំផ្លាញកោសិកាថ្លើម និងបង្កជាជំងឺថ្លើមខ្លាញ់ និងក្រិនថ្លើម។
-កាត់បន្ថយអាហារផ្អែម និងខ្លាញ់៖ ដើម្បីបង្ការកុំឱ្យកើតមាន “ជំងឺថ្លើមលាបខ្លាញ់ដែលមិនមែនមកពីគ្រឿងស្រវឹង (NAFLD)”។
ស្បែកគឺជាកញ្ចក់ឆ្លុះបញ្ចាំងពីសុខភាពខាងក្នុង។ ចូលកុំរំលងរាល់បម្រែបម្រួលតូចតាចនៅលើស្បែក ព្រោះវាអាចជាសម្រែកសុំជំនួយចុងក្រោយរបស់ថ្លើមអ្នកឡើយ៕