យោងតាមការចុះផ្សាយពីប្រភពបរទេស ស្នាមឆ្នូតខ្មៅតូចៗលើក្រចកដែលមើលទៅហាក់ដូចជាការជាំឈាមធម្មតា អាចជាសញ្ញាព្រមាននៃជំងឺមហារីកកោសិកាពណ៌ដែលជាប្រភេទមហារីកស្បែកកាចសាហាវ និងងាយរាលដាលបំផុត។
អ្នកជំនាញផ្នែកសើស្បែកបានដាស់តឿនឱ្យប្រុងប្រយ័ត្នខ្ពស់ ប្រសិនបើអ្នកឃើញមានសញ្ញាមិនធម្មតាដូចជា៖ ស្នាមខ្មៅកើតលើមនុស្សវ័យលើសពី ៥០ ឆ្នាំ, ឆ្នូតខ្មៅមានទទឹងធំជាង ៣ មីលីម៉ែត្រ, ពណ៌ឆ្នូតកាន់តែដិត ឬរីកធំទៅៗ, ពណ៌ខ្មៅរាលដាលដល់សាច់ជុំវិញក្រចក និងក្រចកចាប់ផ្ដើមខូចទ្រង់ទ្រាយ ឬដុះពកដំបៅ។
ជំងឺនេះច្រើនត្រូវបានគេមើលរំលង ដោយសារវាគ្មានការឈឺចាប់ក្នុងដំណាក់កាលដំបូង ប៉ុន្តែវាអាចរាលដាលដល់ឆ្អឹង និងសរីរាង្គក្នុងយ៉ាងឆាប់រហ័ស។ ប្រសិនបើអ្នកសង្កេតឃើញស្នាមខ្មៅអូសបន្លាយយូរនៅលើក្រចកដៃ ក្រចកជើង បាតដៃ ឬបាតជើង គួរប្រញាប់ទៅជួបវេជ្ជបណ្ឌិតឯកទេសដើម្បីពិនិត្យជាបន្ទាន់ ព្រោះការរកឃើញ និងព្យាបាលទាន់ពេលវេលាក្នុងដំណាក់កាលដំបូង នឹងផ្ដល់ឱកាសខ្ពស់ក្នុងការជាសះស្បើយ៕