យោងតាមការចុះផ្សាយពីប្រភពបរទេស ការចុះថមថយសមត្ថភាពផ្លូវភេទលើបុរសវ័យក្រោយ ៤០ ឆ្នាំ មិនមែនបណ្ដាលមកពីវ័យចំណាស់តែមួយមុខឡើយ ប៉ុន្តែវាគឺជាសញ្ញាអាសន្នដែលបង្ហាញពីការថយចុះនៃអ័រម៉ូនតេស្តូស្តេរ៉ូន រួមផ្សំជាមួយជំងឺបង្កប់ក្នុងខ្លួនដូចជាទឹកនោមផ្អែម និងលើសឈាមជាដើម។
សម្ពាធការងារ ការសម្រាកមិនគ្រប់គ្រាន់ និងរបៀបរស់នៅមិនល្អ សុទ្ធតែជាអ្នករុញច្រានឱ្យសុខភាពបុរសធ្លាក់ចុះយ៉ាងឆាប់រហ័សលើសពីការរំពឹងទុក។ ដើម្បីរក្សាបាននូវភាពរឹងមាំ និងថាមពលយូរអង្វែង បុរសៗចាំបាច់ត្រូវផ្លាស់ប្តូរទម្លាប់រស់នៅតាមរយៈការធ្វើលំហាត់ប្រាណពង្រឹងកម្លាំង ការទទួលទានអាហារមានតុល្យភាព និងការសម្រាកឱ្យបានត្រឹមត្រូវ។
អ្វីដែលសំខាន់បំផុតនោះ គឺការពិនិត្យសុខភាពឱ្យបានទៀងទាត់ដើម្បីគ្រប់គ្រងរាល់ជំងឺរ៉ាំរ៉ៃផ្សេងៗ ព្រោះនៅពេលដែលសុខភាពទូទៅរឹងមាំ នោះសមត្ថភាព និងទំនុកចិត្តរបស់បុរសនឹងត្រឡប់មកវិញដោយធម្មជាតិជាក់ជាមិនខាន៕