នៅក្នុងសម័យកាលបច្ចេកវិទ្យា មនុស្សភាគច្រើនចំណាយពេលយ៉ាងហោចណាស់ ៥ម៉ោងក្នុងមួយថ្ងៃដើម្បីអង្គុយធ្វើការ ឬប្រើប្រាស់ឧបករណ៍អេឡិចត្រូនិច ។ ទម្លាប់សាមញ្ញ ដែលមើលទៅហាក់ដូចជា គ្មានគ្រោះថ្នាក់នេះ ត្រូវបានអ្នកជំនាញសុខភាពប្រសិទ្ធនាមថាជា «ឃាតករឈាមត្រជាក់» ព្រោះវាបំផ្លាញសុខភាពរបស់អ្នកដោយស្ងៀមស្ងាត់បំផុត ។
ហេតុអ្វីបានជាការអង្គុយយូរគឺជាគ្រោះថ្នាក់?
នៅពេលរាងកាយស្ថិតក្នុងសភាពស្ងៀមស្ងាត់យូរពេក វានឹងបង្កជាផលវិបាកធ្ងន់ធ្ងរដូចជា៖
-បង្កើនហានិភ័យជំងឺបេះដូង៖ ការអង្គុយយូរធ្វើឱ្យឈាមរត់មិនបានស្រួល និងងាយបង្កជាការស្ទះសរសៃឈាម ដែលជាឫសគល់នៃជំងឺគាំងបេះដូងភ្លាមៗ។
-សត្រូវនៃប្រព័ន្ធរំលាយអាហារ៖ វាកាត់បន្ថយប្រសិទ្ធភាពនៃជញ្ជ្រួញពោះវៀន បង្កឱ្យមានអាការៈហើមពោះ និងទល់លាមក ដែលប៉ះពាល់ដល់ការបឺតស្រូបជីវជាតិពីអាហារសុខភាព។
-បញ្ហាសន្លាក់ និងឆ្អឹងខ្នង ៖ សម្ពាធដែលសង្កត់លើឆ្អឹងត្រគាក និងឆ្អឹងខ្នងយូរពេក នឹងធ្វើឱ្យសាច់ដុំចុះខ្សោយ និងបង្កការឈឺចាប់រ៉ាំរ៉ៃ។
-ការកើនឡើងជាតិស្ករ និងជាតិខ្លាញ់៖ ការមិនបញ្ចេញសកម្មភាពរាងកាយ ធ្វើឱ្យរាងកាយពិបាកដុតរំលាយកាឡូរី និងបង្កើនហានិភ័យនៃជំងឺទឹកនោមផ្អែម។
វិធីសាស្ត្រទប់ទល់នឹង «ឃាតករឈាមត្រជាក់»
ដើម្បីការពារខ្លួនពីគ្រោះថ្នាក់នេះ លោកអ្នកអាចអនុវត្តតាមវិធីសាស្ត្រងាយៗ តែមានប្រសិទ្ធភាពខ្ពស់ដូចខាងក្រោម៖
១. ច្បាប់ ៥០/៥ ៖ ក្នុងរាល់ការអង្គុយធ្វើការ ៥០នាទី លោកអ្នកគួរក្រោកឈរ ឬដើរចេញពីកៅអីរយៈពេល ៥នាទី ដើម្បីជម្រុញឱ្យឈាមរត់បានស្រួលឡើងវិញ ។ ២. ប្រើប្រាស់ «ថ្នាំទិព្វ» នៃការដើរ ៖ ការដើរត្រឹមតែ ៣០នាទីរាល់ថ្ងៃ អាចជួយលាងជម្រះផលប៉ះពាល់នៃការអង្គុយយូរ និងពង្រឹងសាច់ដុំបេះដូងឱ្យរឹងមាំ ។ ៣. ផឹកទឹកឱ្យត្រូវពេលវេលា ៖ ការទទួលទានទឹកឱ្យបានគ្រប់គ្រាន់ និងទៀងទាត់ ជួយឱ្យឈាមមិនសូវខាប់ និងសម្រួលដល់ដំណើរការនៃសរីរាង្គខាងក្នុង។ ៤. លំហាត់ប្រាណយឺតៗ ៖ ការធ្វើចលនាបត់បែននៅកន្លែងធ្វើការ ដូចជា ការបង្វិលក ឬពត់ខ្លួន ជួយកាត់បន្ថយភាពតានតឹងនៃសាច់ដុំ និងសរសៃឈាម ។
«ជីវិតគឺស្ថិតលើចលនា» ។ កុំបណ្តោយឱ្យកៅអីធ្វើការក្លាយជាសត្រូវនៃសុខភាពរបស់អ្នក។ ការផ្លាស់ប្តូរទម្លាប់តូចតាចដោយការក្រោកឈរ និងដើរឱ្យបានច្រើន គឺជាគន្លឹះដ៏មហាសាលក្នុងការកសាងសុខភាពមាំមួន និងជីវិតប្រកបដោយថាមពល។