យោងតាមការចុះផ្សាយពីប្រភពបរទេស ផ្ទុយពីការយល់ឃើញទូទៅដែលថាការដើរចុះជណ្តើរគឺជាការហាត់ប្រាណកម្រិតស្រាល និងមិនសូវមានប្រសិទ្ធភាព ការសិក្សាថ្មីមួយពីសាកលវិទ្យាល័យ Edith Cowan (អូស្ត្រាលី) បានបង្ហាញថាវាគឺជាទម្រង់នៃលំហាត់ប្រាណបែប Eccentric (ការប្រើកម្លាំងសាច់ដុំក្នុងពេលពន្លាត) ដែលផ្ដល់ផលប្រយោជន៍លើសពីការរំពឹងទុក។ ការសិក្សាបានបញ្ជាក់ថា សកម្មភាពបែបនេះបង្កើតកម្លាំងសាច់ដុំខ្លាំងជាងការលើកទម្ងន់ ឬការដើរឡើងជណ្តើររហូតដល់ ២០% ដោយសារការស្ទុះឡើងនៃប្រូតេអ៊ីន Titin ដែលដើរតួដូចជា “រ៉ឺស័រជីវសាស្ត្រ” នៅក្នុងកោសិកាសាច់ដុំ។
ចំណុចពិសេសនៃការដើរចុះជណ្តើរគឺវាប្រើប្រាស់ថាមពល និងអុកស៊ីហ្សែនតិច ដែលធ្វើឱ្យអ្នកមិនសូវហត់ខ្លាំង ឬបែកញើសជោកដូចការដើរឡើងឡើយ ប៉ុន្តែវាផ្តល់នូវប្រសិទ្ធភាពខ្ពស់បំផុតសម្រាប់អ្នកដែលមានកម្លាំងខ្សោយ ឬមនុស្សចាស់។ លើសពីនេះ ការដើរចុះជណ្តើរតម្រូវឱ្យមានការផ្ដោតអារម្មណ៍ និងការបញ្ជាពីប្រព័ន្ធប្រសាទខ្ពស់ជាងមុន ដែលជាវិធីដ៏ល្អក្នុងការហ្វឹកហាត់ខួរក្បាល។ លទ្ធផលនៃការពិសោធន៍លើស្ត្រីដែលមានវ័យចំណាស់ និងលើសទម្ងន់បានបង្ហាញថា អ្នកដែលដើរចុះជណ្តើរជាប្រចាំមានការវិវត្តល្អប្រសើរទៅលើចង្វាក់បេះដូង សម្ពាធឈាម និងសុខភាពរាងកាយទាំងមូល បើប្រៀបធៀបទៅនឹងការហាត់ប្រាណដទៃទៀត៕