យោងតាមការចុះផ្សាយពីប្រភពបរទេស ថ្វីត្បិតតែមនុស្សជាច្រើនមានការរុញរាមិនហ៊ានទទួលទានសាច់អន្ទង់ដោយសាររូបរាង ឬទីជម្រករបស់វា ប៉ុន្តែតាមទស្សនៈរបស់អ្នកជំនាញអាហារូបត្ថម្ភ អន្ទង់គឺជា “កំពូលអាហារ” ដែលផ្ដល់តម្លៃខ្ពស់បំផុតសម្រាប់សុខភាពបេះដូង ខួរក្បាល ភ្នែក និងឆ្អឹង។
ចំណុចដែលគួរឱ្យភ្ញាក់ផ្អើលបំផុតនោះគឺ ក្នុងសាច់អន្ទង់ ១០០ ក្រាម មានផ្ទុកអាស៊ីតខ្លាញ់ Omega-3រហូតដល់ជាង ១,៨០០ មិល្លីក្រាម ដែលបរិមាណនេះអាចប្រៀបផ្ទឹមបានទៅនឹងការទទួលទានថ្នាំគ្រាប់ប្រេងត្រីចំនួន ២ គ្រាប់។ សារធាតុទាំងនេះដើរតួជាអ្នកការពារសរសៃឈាម កាត់បន្ថយជាតិខ្លាញ់អាក្រក់ និងជួយពន្យឺតការចុះខ្សោយនៃកោសិកាខួរក្បាល ជាពិសេសសម្រាប់មនុស្សចាស់ និងសិស្សនិស្សិតដែលប្រើប្រាស់ខួរក្បាលច្រើន។
ក្រៅពីជាតិខ្លាញ់ល្អ សាច់អន្ទង់ក៏ជាប្រភពប្រូតេអ៊ីនដ៏អស្ចារ្យផងដែរ ដោយវាមានជាតិប្រូតេអ៊ីនខ្ពស់ជាងភ្លៅមាន់ទៅទៀត ដែលជួយដល់ការលូតលាស់សាច់ដុំ និងការស្ដារកម្លាំងឡើងវិញបន្ទាប់ពីហាត់ប្រាណ។ លើសពីនេះ អន្ទង់សម្បូរទៅដោយវីតាមីន A ដែលជួយឱ្យភ្នែកមើលឃើញច្បាស់ក្នុងទីងងឹត និងការពារអាការៈស្ងួតភ្នែក ព្រមទាំងមានវីតាមីន D ខ្ពស់បំផុត ដែលជួយសម្រួលដល់ការស្រូបយកជាតិកាល់ស្យូមទៅក្នុងឆ្អឹង និងពង្រឹងប្រព័ន្ធការពាររាងកាយ។
ទោះបីជាអ្នកមិនទម្លាប់នឹងរសជាតិរបស់វា ក៏អ្នកគួរតែសាកល្បងបន្ថែមសាច់អន្ទង់ទៅក្នុងរបបអាហារក្នុងបរិមាណតិចតួច ដើម្បីទទួលបាននូវសារធាតុចិញ្ចឹមដ៏កម្រដែលរាងកាយត្រូវការជាចាំបាច់៕