យោងតាមការចុះផ្សាយពីប្រភពបរទេស កម្រិតនៃភាពទុំរបស់ផ្លែចេកមិនត្រឹមតែប្រែប្រួលរសជាតិប៉ុណ្ណោះទេ ប៉ុន្តែថែមទាំងផ្លាស់ប្តូរគុណតម្លៃអាហារូបត្ថម្ភយ៉ាងខ្លាំង ដែលសមស្របទៅតាមតម្រូវការសុខភាពខុសៗគ្នា៖
ចេកខ្ចីសម្បូរទៅដោយ “ម្សៅធន់”ដែលមានមុខងារដូចជាជាតិសរសៃ ជួយចិញ្ចឹមបាក់តេរីល្អក្នុងពោះវៀន កាត់បន្ថយការរលាក និងរក្សាកម្រិតជាតិស្ករក្នុងឈាមឱ្យមានស្ថិរភាព។ វាជាជម្រើសដ៏ល្អបំផុតសម្រាប់អ្នកចង់សម្រកទម្ងន់ អ្នកមានជំងឺទឹកនោមផ្អែមប្រភេទទី២ ឬអ្នកដែលមានបញ្ហាមេតាបូលីស។ ចំពោះចេកដែលទើបតែចាប់ផ្ដើមទុំ (សំបកលឿង ក្បាលខៀវ) វាផ្ដល់នូវតុល្យភាពល្អរវាងជាតិសរសៃ និងជាតិស្ករធម្មជាតិ ព្រមទាំងរក្សាបាននូវកម្រិតប៉ូតាស្យូម និងម៉ាញេស្យូមខ្ពស់សម្រាប់ជួយដល់សម្ពាធឈាម និងសុខភាពឆ្អឹង។
សម្រាប់ចេកទុំលឿងសុទ្ធ វាគឺជាប្រភពថាមពលដ៏រហ័សសម្រាប់អ្នកហាត់ប្រាណ ព្រោះម្សៅភាគច្រើនបានបំប្លែងទៅជាស្ករធម្មជាតិដែលងាយស្រូបយក និងសម្បូរទៅដោយសារធាតុប្រឆាំងអុកស៊ីតកម្ម។ ដោយឡែក ចេកទុំជោ (មានស្នាមអុជខ្មៅ) គឺជាកម្រិតដែលផ្ដល់ជាតិស្ករខ្ពស់បំផុត និងងាយរំលាយបំផុត សមស្របសម្រាប់អ្នកដែលមានប្រព័ន្ធរំលាយអាហារខ្សោយ ឬអ្នកដែលត្រូវការជាតិផ្អែមពីធម្មជាតិសម្រាប់ធ្វើនំ។ ប៉ុន្តែអ្នកជំងឺទឹកនោមផ្អែមគួរប្រុងប្រយ័ត្នចំពោះចេកកម្រិតនេះ។ ការជ្រើសរើសចេកឱ្យត្រូវនឹងកម្រិតទុំ មិនត្រឹមតែជួយឱ្យញ៉ាំឆ្ងាញ់ប៉ុណ្ណោះទេ ប៉ុន្តែវាគឺជាឱសថធម្មជាតិដែលជួយតម្រូវតាមស្ថានភាពសុខភាពជាក់ស្ដែងរបស់បុគ្គលម្នាក់ៗ៕
ការប្រុងប្រយ័ត្ន!
ព័ត៌មាននេះគ្រាន់តែជាចំណេះដឹងទូទៅប៉ុណ្ណោះ។ បើសិនជាអ្នកមានបញ្ហាសុខភាពមិនប្រក្រតីណាមួយ សូមមេត្តាទៅជួបពិគ្រោះជាមួយគ្រូពេទ្យជំនាញ ដើម្បីទទួលបានការធ្វើរោគវិនិច្ឆ័យ និងការព្យាបាលត្រឹមត្រូវ៕