​ទម្លាប់ញ៉ាំទឹកស៊ុប​អស់ពីចាន៖ ឆ្ងាញ់មាត់​ តែផ្ដល់ហានិភ័យដល់តម្រងនោម និងបេះដូង​

យោងតាមការចុះផ្សាយពីប្រភពបរទេស គុយទាវ ឬ ហ្វឺ​គឺជាអាហារដ៏ពេញនិយម ប៉ុន្តែទម្លាប់ញ៉ាំទឹកស៊ុបអស់ពីចានអាចបង្កផលប៉ះពាល់ដល់សុខភាពយ៉ាងធ្ងន់ធ្ងរក្នុងរយៈពេលវែង។

បើតាមការបញ្ជាក់របស់អ្នកជំនាញអាហារូបត្ថម្ភ ទឹកស៊ុប​មួយចានមានផ្ទុកជាតិអំបិលរហូតដល់ទៅ ៣.៨ ក្រាម ដែលចំនួននេះស្មើនឹងជិត ៨០% នៃបរិមាណអំបិលដែលអង្គការសុខភាពពិភពលោក (WHO) ណែនាំឱ្យទទួលទានក្នុងមួយថ្ងៃ (មិនឱ្យលើសពី ៥ ក្រាម)។ ការទទួលទានជាតិអំបិលច្រើនហួសប្រមាណគឺជាមូលហេតុចម្បងនៃជំងឺលើសឈាម បញ្ហាបេះដូង គ្រួសក្នុងតម្រងនោម និងជំងឺពុកឆ្អឹង។

ក្រៅពីបញ្ហាជាតិអំបិល ការរំងាស់ឆ្អឹងក្នុងរយៈពេលយូរដើម្បីយកទឹកស៊ុប ក៏បញ្ចេញនូវសារធាតុ​ដែលអាចធ្វើឱ្យអាស៊ីតអ៊ុយរិកក្នុងឈាមកើនឡើង បង្កជាហានិភ័យនៃជំងឺសន្លាក់ហ្គោដ​។ លើសពីនេះ ជាតិខ្លាញ់ដែលរលាយចេញពីខួរឆ្អឹង ក៏បង្កើនកម្រិតខ្លាញ់មិនល្អដែលប៉ះពាល់ដល់សរសៃឈាមបេះដូងផងដែរ។ គុយទាវឬហ្វឺក៏ជាអាហារដែលសម្បូរម្សៅ ប៉ុន្តែខ្វះជាតិសរសៃ​ដែលអាចបណ្ដាលឱ្យមានបញ្ហាទល់លាមក និងអតុល្យភាពអាហារូបត្ថម្ភប្រសិនបើទទួលទានរាល់ថ្ងៃ។

អ្នកជំនាញណែនាំឱ្យផ្លាស់ប្តូរមុខម្ហូបឱ្យបានចម្រុះ ជៀសវាងការញ៉ាំទឹកស៊ុបអស់ពីចាន និងត្រូវប្រុងប្រយ័ត្នខ្ពស់ចំពោះមនុស្សចាស់ អ្នកជំងឺលើសឈាម និងអ្នកមានបញ្ហាតម្រងនោម ដើម្បីរក្សាសុខភាពឱ្យបានយូរអង្វែង៕