យោងតាមការចុះផ្សាយពីប្រភពបរទេស ការចង់បានរាងស្អាត និងសុខភាពល្អតាមរយៈការញ៉ាំស៊ុត អាចក្លាយជាសោកនាដកម្ម ប្រសិនបើអ្នកជ្រើសរើសការញ៉ាំបែបមិនឆ្អិន ឬ “ជ័រព្នៅ”។
តាមបច្ចេកទេស ការចម្អិនស៊ុតជ័រព្នៅប្រើសីតុណ្ហភាពត្រឹមតែប្រហែល ៦០ អង្សាសេប៉ុណ្ណោះ ដែលកម្រិតនេះមិនអាចសម្លាប់មេរោគ ឬបាក់តេរី ដែលរស់នៅលើសំបកស៊ុតបានឡើយ រួចវាធ្វើដំណើរពីពោះវៀនចូលទៅក្នុងចរន្តឈាមរហូតបង្កការរលាក និងបង្កើតជាដុំខ្ទុះនៅក្នុងថ្លើម។ លើសពីនេះ ការយល់ឃើញថាស៊ុតមិនសូវឆ្អិនផ្ដល់ជីវជាតិច្រើនជាងក៏ជាកំហុសមួយដែរ ព្រោះរាងកាយអាចស្រូបយកប្រូតេអ៊ីនពីស៊ុតឆ្អិនបានដល់ទៅ ៩៥% ខណៈស៊ុតឆៅអាចស្រូបបានត្រឹមតែ ៥០% ហើយថែមទាំងរារាំងការស្រូបយកវីតាមីនទៀតផង។
ដើម្បីសុវត្ថិភាព អ្នកជំនាញណែនាំឱ្យទទួលទានស៊ុតដែលចម្អិនឆ្អិនល្អទាំងផ្នែកស និងផ្នែកលឿង ជៀសវាងការទុកស៊ុតឆៅនៅជិតអាហារឆ្អិន និងត្រូវលាងដៃឱ្យស្អាតបន្ទាប់ពីកាន់សំបកស៊ុត ជាពិសេសសម្រាប់កុមារ និងស្ត្រីមានផ្ទៃពោះដែលត្រូវហាមឃាត់ដាច់ខាតចំពោះការទទួលទានស៊ុតមិនឆ្អិនបែបនេះ៕