យោងតាមការចុះផ្សាយពីប្រភពបរទេស ក្នុងថ្ងៃអាកាសធាតុក្តៅ មនុស្សជាច្រើនតែងជ្រើសរើសស្រាបៀរត្រជាក់ៗដើម្បី “បំបាត់ការស្រេកទឹក” ប៉ុន្តែតាមពិតទៅ នេះគឺជាការយល់ច្រឡំដ៏គ្រោះថ្នាក់មួយ។
បើតាមការបកស្រាយពីអ្នកជំនាញអាហារូបត្ថម្ភ អារម្មណ៍ស្រស់ស្រាយដែលអ្នកទទួលបាន គឺគ្រាន់តែជាឥទ្ធិពលបណ្ដោះអាសន្ននៃភាពត្រជាក់ដែលប៉ះនឹងមាត់ និងបំពង់កតែប៉ុណ្ណោះ។ ផ្ទុយទៅវិញ ជាតិអាកុលនៅក្នុងស្រាបៀរមានសមត្ថភាពរារាំងអ័រម៉ូនដែលជួយរក្សាជាតិទឹកក្នុងរាងកាយ ដែលធ្វើឱ្យតម្រងនោមបញ្ចេញទឹកនោមច្រើនជាងមុន ជាហេតុនាំឱ្យរាងកាយធ្លាក់ចូលក្នុងស្ថានភាពខ្សោះជាតិទឹក ស្ងួតមាត់ និងឈឺក្បាលបន្ទាប់ពីផឹកួច។
ការប្រើប្រាស់ស្រាបៀរដើម្បីរំលាយកម្តៅមិនត្រឹមតែមិនជួយផ្ដល់ជាតិទឹកដល់កោសិកាប៉ុណ្ណោះទេ ប៉ុន្តែថែមទាំងបង្កើនបន្ទុកយ៉ាងធ្ងន់ធ្ងរដល់ថ្លើម និងតម្រងនោមផងដែរ។ នៅពេលថ្លើមត្រូវធ្វើការលើសកម្លាំងដើម្បីបន្សាបជាតិអាកុលក្នុងរយៈពេលវែង វានឹងបង្កើនហានិភ័យនៃជំងឺថ្លើមខ្លាញ់ រលាកថ្លើម និងឈានទៅរកការកើតមហារីកថ្លើម។ ចំពោះតម្រងនោមវិញ ការដែលត្រូវធ្វើការចម្រោះ និងបញ្ចេញទឹកនោមឥតឈប់ឈរតាមការរំញោចរបស់ជាតិស្រា នឹងធ្វើឱ្យបាត់បង់តុល្យភាពអេឡិចត្រូឡីត និងប៉ះពាល់ដល់មុខងារតម្រងនោមទាំងស្រុង។
ដើម្បីបំបាត់ការស្រេកទឹក និងធ្វើឱ្យរាងកាយត្រជាក់ដោយសុវត្ថិភាពក្នុងរដូវក្ដៅ អ្នកជំនាញណែនាំឱ្យអាទិភាពលើការផឹកទឹកស្អាត ឬទឹកផ្លែឈើធម្មជាតិដែលមិនបន្ថែមស្ករ។ ក្នុងករណីដែលអ្នកត្រូវធ្វើការក្រោមពន្លឺថ្ងៃខ្លាំង ឬហាត់ប្រាណ ការប្រើប្រាស់ទឹកអេឡិចត្រូឡីតគឺជាជម្រើសដ៏ល្អបំផុតដើម្បីបំពេញជាតិទឹកដែលបាត់បង់។
អ្នកគួរចងចាំថា ស្រាបៀរមិនមែនជាភេសជ្ជៈសម្រាប់បំបាត់ការស្រេកទឹកឡើយ ហើយការកម្រិតការទទួលទានគ្រឿងស្រវឹងគឺជាមធ្យោបាយដ៏ល្អបំផុតដើម្បីការពារសុខភាពរបស់អ្នកក្នុងរដូវប្រាំងនេះ៕