យោងតាមការចុះផ្សាយពីប្រភពបរទេស ការប្រុងប្រយ័ត្នចំពោះការញ៉ាំប្រៃ និងសាច់ខ្លាញ់គឺជារឿងល្អ ប៉ុន្តែការមើលរំលងទម្លាប់ញ៉ាំនំប៉័ងផ្អែម ឬអាហារកែច្នៃជារៀងរាល់ថ្ងៃ អាចនាំឱ្យរាងកាយរងគ្រោះដោយសារ “ជាតិខ្លាញ់បំប្លែង”ដែលអង្គការសុខភាពពិភពលោក (WHO) បានដាក់ក្នុងបញ្ជីខ្មៅត្រូវលុបបំបាត់ចោល។
ជាតិខ្លាញ់ប្រភេទនេះដែលច្រើនមាននៅក្នុងនំកែកឃឺ នំខេក អាហារបំពង និងបឺររុក្ខជាតិ ផ្ដល់គ្រោះថ្នាក់ខ្លាំងបំផុតដោយសារវាបង្កើនកម្រិតខ្លាញ់អាក្រក់យ៉ាងគំហុក រហូតបង្កជាបញ្ហាសរសៃឈាមឡើងរឹង លើសឈាម និងបង្កើនហានិភ័យនៃជំងឺគាំងបេះដូង ឬដាច់សរសៃឈាមខួរក្បាលដោយមិនដឹងខ្លួន។
លើសពីការបំផ្លាញប្រព័ន្ធសរសៃឈាម វាក៏ជាភ្នាក់ងារជម្រុញឱ្យរាងកាយឆាប់ចាស់ជាងវ័យ ប៉ះពាល់ដល់ការចងចាំនៃខួរក្បាល និងរំខានដល់ប្រព័ន្ធអ័រម៉ូនទៀតផង ដូច្នេះដើម្បីការពារសុខភាពក្នុងរយៈពេលវែង អ្នកគួរផ្លាស់ប្តូរមកជ្រើសរើសអាហារស្រស់ៗ កាត់បន្ថយអាហារសម្រន់កែច្នៃ និងត្រូវពិនិត្យស្លាកសញ្ញាផលិតផលឱ្យបានហ្មត់ចត់បំផុតមុននឹងសម្រេចចិត្តបរិភោគ។