យោងតាមការចុះផ្សាយពីប្រភពបរទេស ការបន្សាបជាតិពុលតាមរយៈវិធីសាស្ត្រ “Detox” ដែលកំពុងពេញនិយមតាមបណ្ដាញសង្គម ត្រូវបានអ្នកជំនាញវេជ្ជសាស្ត្រព្រមានថាអាចបង្កជាផលវិបាកធ្ងន់ធ្ងរដល់ជីវិត ជាជាងការផ្ដល់ផលចំណេញដល់សុខភាព។
ជាការពិត រាងកាយមនុស្សមានប្រព័ន្ធបន្សាបជាតិពុលធម្មជាតិដ៏អស្ចារ្យតាមរយៈថ្លើម តម្រងនោម និងពោះវៀនរួចជាស្រេច ដែលមិនចាំបាច់ត្រូវការការលាងសម្អាតដោយវិធីសាស្ត្របង្ខំដូចជា ការបញ្ចូលកាហ្វេតាមរន្ធគូថដែលបង្កឱ្យរហែកក្រសាលគូថ ឬការប្រើប្រាស់ផលិតផលបន្សាបជាតិពុលតាមជើងដែលគ្រាន់តែជាល្បិចបោកបញ្ឆោតផ្នែកគីមីនោះទេ។ ការបង្អត់អាហារដើម្បីបន្សាបជាតិពុលក្នុងរយៈពេលយូរ មិនត្រឹមតែមិនជួយឱ្យស្រកទម្ងន់ប្រកបដោយសុខភាពឡើយ ប៉ុន្តែវាអាចបណ្ដាលឱ្យរាងកាយខ្វះជាតិស្ករធ្ងន់ធ្ងរ បាត់បង់តុល្យភាពអេឡិចត្រូលីត ប៉ះពាល់ដល់មុខងារបេះដូង និងអាចឈានដល់ការស្លាប់ភ្លាមៗ។
ដើម្បីថែរក្សាសុខភាពឱ្យបានល្អបំផុត អ្នកជំនាញណែនាំឱ្យងាកមកអនុវត្តរបបអាហារដែលមានតុល្យភាព ញ៉ាំទឹកឱ្យបានគ្រប់គ្រាន់ គេងឱ្យបានស្កប់ស្កល់ និងហាត់ប្រាណជាប្រចាំ ជាជាងការជឿតាមការផ្សព្វផ្សាយខ្វះមូលដ្ឋានវិទ្យាសាស្ត្រ ដែលនាំឱ្យ “ខាតទាំងប្រាក់ បង់ទាំងសុខភាព”៕