យោងតាមការចុះផ្សាយពីប្រភពបរទេស ចង្កឹះឈើគឺជាសម្ភារៈផ្ទះបាយដែលពេញនិយមបំផុត ប៉ុន្តែវាក៏ជាកន្លែងសំបុកមេរោគផងដែរ ប្រសិនបើប្រើប្រាស់មិនបានត្រឹមត្រូវ។
ដើម្បីធានាសុវត្ថិភាពដល់សុខភាពក្រុមគ្រួសារ អ្នកគួរយកចិត្តទុកដាក់លើចំណុចសំខាន់ៗមួយចំនួន ជាពិសេសគឺការផ្លាស់ប្តូរចង្កឹះថ្មីជារៀងរាល់ ៣ ទៅ ៦ ខែម្ដង ព្រោះចង្កឹះដែលប្រើក្នុងរយៈពេលយូរនឹងមានស្នាមប្រេះស្រាំ ដែលជាជម្រកដ៏ល្អសម្រាប់បាក់តេរី និងផ្សិតសំបុក។ ទម្លាប់នៃការត្រាំចង្កឹះក្នុងទឹកយូរពេក ឬទុកចោលមួយយប់ ក៏ជាមូលហេតុធ្វើឱ្យឈើឆាប់ពុក ជោកជាំដោយសំណើម និងបង្កឱ្យមានក្លិនមិនល្អ។
ប្រសិនបើអ្នកសង្កេតឃើញចង្កឹះមានសញ្ញាដូចជា មានស្នាមខ្មៅឬសខុសធម្មតា មានក្លិនជូរផ្អូម ឬមានសភាពរំអិលស្អិត ទោះបីជាលាងសម្អាតរួចក៏ដោយ គួរតែបោះចោលជាបន្ទាន់ ព្រោះជាតិពុលពីផ្សិតលើឈើអាចបង្កគ្រោះថ្នាក់ដល់ប្រព័ន្ធរំលាយអាហារ និងថ្លើម។ បន្ថែមពីនេះ គួរចៀសវាងការប្រើចង្កឹះដែលមានលាបពណ៌ឆើតឆាយគ្មានប្រភពច្បាស់លាស់ ព្រោះជាតិថ្នាំអាចរលាយចូលក្នុងអាហារក្ដៅៗ។ ដើម្បីការពារមេរោគ អ្នកគួរអនុវត្តការសម្លាប់មេរោគជាប្រចាំតាមរយៈការស្រឡុះទឹកក្ដៅអង្គប់ រួចដាក់ហាលនៅកន្លែងដែលមានខ្យល់ចេញចូលល្អ ឬហាលថ្ងៃខ្សោយៗ ដើម្បីជម្រះសំណើម និងធានាឱ្យចង្កឹះស្ងួតជានិច្ចមុននឹងយកមកប្រើប្រាស់៕