​លាហើយក្លិនផ្អួរ! ៥ វិធីសាស្ត្រជួយឱ្យខោអាវក្រអូប បើទោះជាគ្មានពន្លឺថ្ងៃ

យោងតាមការចុះផ្សាយពីប្រភពបរទេស បញ្ហាសម្លៀកបំពាក់មានក្លិនផ្អួរមិនត្រឹមតែធ្វើឱ្យយើងបាត់បង់ទំនុកចិត្តប៉ុណ្ណោះទេ ប៉ុន្តែវាថែមទាំងជាសញ្ញានៃការកកើតបាក់តេរី និងមេរោគផ្សិតដែលបណ្តាលមកពីសំណើមខ្លាំង។

ដើម្បីដោះស្រាយបញ្ហានេះឱ្យមានប្រសិទ្ធភាព ១០០% អ្នកជំនាញបានណែនាំនូវរូបមន្តងាយៗរួមមាន៖ ការប្រើប្រាស់ទឹកខ្មេះស ជួយសម្លាប់បាក់តេរី និងរំលាយជាតិខ្លាញ់ , ការបន្ថែមម្សៅ Baking Soda កន្លះកែវចូលក្នុងម៉ាស៊ីនបោកគក់ ជួយបឺតស្រូបក្លិនមិនល្អ , ការបោកជាមួយទឹកក្តៅក្នុងសីតុណ្ហភាព ៤០-៦០ អង្សាសេ ដើម្បីសម្លាប់មេរោគឱ្យអស់ពីសរសៃក្រណាត់ , ការលាងសម្អាតធុងម៉ាស៊ីនបោកគក់ឱ្យបានទៀងទាត់ និងការហាលសម្លៀកបំពាក់ដោយរក្សាគម្លាតពីគ្នាឱ្យបានសមរម្យដើម្បីឱ្យខ្យល់ចេញចូលបានល្អ។

ចំពោះករណីប្រញាប់ អ្នកអាចប្រើម៉ាស៊ីនផ្លុំសក់ដើម្បីសម្ងួតសំណើម និងក្លិនចេញជាបន្ទាន់ ប៉ុន្តែត្រូវចាំថាដាច់ខាតកុំបាញ់ទឹកអប់បន្ថែមលើខោអាវដែលមានក្លិនផ្អួរ ព្រោះវានឹងធ្វើឱ្យក្លិនកាន់តែអាក្រក់លើសដើម។ ការដោះស្រាយចំឫសគល់នៃបាក់តេរី គឺជាគន្លឹះតែមួយគត់ដែលធ្វើឱ្យសម្លៀកបំពាក់របស់អ្នកក្រអូបស្រស់ស្រាយ៕