យោងតាមការចុះផ្សាយពីប្រភពរទេស លោកវេជ្ជបណ្ឌិតឯកទេសផ្នែកថ្លើមនៅប្រទេសជប៉ុន បានសម្រេចជោគជ័យក្នុងការសម្រកទម្ងន់រហូតដល់ ២១ គីឡូក្រាម និងព្យាបាលជំងឺខ្លាញ់រុំថ្លើមបានយ៉ាងមានប្រសិទ្ធភាពតាមរយៈការកែសម្រួលរបបអាហារយ៉ាងសាមញ្ញបំផុត។
ក្នុងស្ថានភាពដែលធ្លាប់មានទម្ងន់រហូតដល់ ១២៨ គីឡូក្រាម និងប្រឈមនឹងជំងឺហ្គោដរួមទាំងបញ្ហាចង្វាក់បេះដូង លោកបានសម្រេចចិត្តបោះបង់ចោលជាតិម្សៅដូចជា បាយ មី និងនំបុ័ងទាំងស្រុង ដោយជំនួសមកវិញនូវការទទួលទានស៊ុតជាអាហារចម្បង។ មូលហេតុដែលវិធីសាស្ត្រនេះមានប្រសិទ្ធភាព គឺដោយសារស៊ុតសម្បូរទៅដោយប្រូតេអ៊ីនគុណភាពខ្ពស់ដែលជួយឱ្យរាងកាយឆ្អែតបានយូរ កាត់បន្ថយការឃ្លានខុសប្រក្រតី និងជួយជំរុញការដុតរំលាយជាតិខ្លាញ់បានយ៉ាងល្អបំផុត។
ក្រោយរយៈពេល ២ ឆ្នាំនៃការអនុវត្តជាប់លាប់ សន្ទស្សន៍មុខងារថ្លើមរបស់លោកបានត្រឡប់មកសភាពធម្មតាវិញ ហើយអាការៈជំងឺហ្គោដក៏ត្រូវបានធូរស្រាលយ៉ាងខ្លាំងដែលធ្វើឱ្យសុខភាពទូទៅមានភាពល្អប្រសើរឡើងវិញ។ ទោះជាយ៉ាងណា ដើម្បីធានាបាននូវតុល្យភាពអាហារូបត្ថម្ភនិងជៀសវាងការអស់កម្លាំងល្ហិតល្ហៃ អ្នកជំនាញបានណែនាំឱ្យអ្នកដែលចង់អនុវត្តតាមគួរគប្បីបន្ថែមជាតិម្សៅល្អៗក្នុងបរិមាណតិចតួចដូចជា អង្ករសំរូប ឬដំឡូងស្ងោរ ដើម្បីផ្ដល់ថាមពលចាំបាច់ដល់រាងកាយ។ ការជ្រើសរើសរបបអាហារដែលសម្បូរប្រូតេអ៊ីនពីស៊ុត និងការកាត់បន្ថយជាតិម្សៅចម្រាញ់ គឺជាគន្លឹះដ៏សំខាន់មិនត្រឹមតែសម្រាប់សម្រកទម្ងន់ប៉ុណ្ណោះទេ ប៉ុន្តែថែមទាំងជួយការពារសរីរាង្គខាងក្នុងឱ្យជៀសផុតពីជំងឺកាចសាហាវផ្សេងៗទៀតផង៕