យោងតាមការចុះផ្សាយពីប្រភពបរទេស ស្ត្រីជាច្រើនតែងមានកង្វល់ និងការយល់ច្រឡំថា ការរួមភេទញឹកញាប់នឹងធ្វើឱ្យទ្វារមាសរីកធំ បាត់បង់ភាពតឹងណែន និងសមត្ថភាពកន្ត្រាក់ ប៉ុន្តែតាមការពិតទៅ នេះគឺជាការយល់ខុសទាំងស្រុង ខណៈដែលវេជ្ជបណ្ឌិតជំនាញផ្នែករោគស្ត្រីបានបញ្ជាក់ថា ទ្វារមាសគឺជាទម្រង់សាច់ដុំដែលមានសមត្ថភាពបត់បែន យឺត និងរុញមកសភាពដើមវិញបានយ៉ាងអស្ចារ្យ ដែលការរួមភេទធម្មតាមិនអាចធ្វើឱ្យវាប្រែប្រួលទំហំជាអចិន្ត្រៃយ៍បានឡើយ។
មូលហេតុពិតប្រាកដដែលធ្វើឱ្យទ្វារមាសបាត់បង់ភាពតឹងណែន គឺបណ្ដាលមកពីការចុះខ្សោយនៃសាច់ដុំអាងត្រគាកក្រោយសម្រាលកូនដោយធម្មជាតិ ដែលធ្វើឱ្យសរសៃចង និងសាច់ដុំរងការយឺតខ្លាំង ប្រសិនបើការស្ដារឡើងវិញមិនបានល្អ វានឹងធ្វើឱ្យកម្លាំងកន្ត្រាក់ខ្សោយជាងមុន។ កត្តាទីពីរគឺការថយចុះនៃអ័រម៉ូនអេស្ត្រូសែន ជាពិសេសចំពោះស្ត្រីដែលមានអាយុលើសពី ៣៥ ឆ្នាំ ឬឈានចូលវ័យជិតអស់រដូវ ដែលធ្វើឱ្យជាលិកាទ្វារមាសកាន់តែស្ដើង បាត់បង់សំណើម និងភាពយឺតនៃកូឡាជែន នាំឱ្យមានអារម្មណ៍ថាមិនសូវតឹងណែនដូចមុន ទោះបីជាមិនបានរួមភេទច្រើនដងក៏ដោយ។
បន្ថែមលើនេះ របៀបរស់នៅប្រចាំថ្ងៃដូចជា ការអង្គុយច្រើនពេក ភាពធាត់លើសទម្ងន់ ការទល់លាមករ៉ាំរ៉ៃ ឬការលើករបស់ធ្ងន់ៗ សុទ្ធតែបង្កសម្ពាធដល់អាងត្រគាក និងធ្វើឱ្យសាច់ដុំដែលជួយទប់ទល់ទ្វារមាសខ្សោយកម្លាំងបន្តិចម្ដងៗ ដែលនេះជារឿងទាក់ទងនឹងគុណភាពសាច់ដុំសុទ្ធសាធ មិនមែនទាក់ទងនឹងចំនួនដងនៃការរួមភេទនោះទេ។
ដើម្បីរក្សាភាពរឹងមាំ និងភាពតឹងណែននៃតំបន់អាងត្រគាក ស្ត្រីគួរតែងាកមកយកចិត្តទុកដាក់លើការហាត់ប្រាណពង្រឹងសាច់ដុំអាងត្រគាក និងថែរក្សាសុខភាពរាងកាយឱ្យបានល្អដើម្បីរក្សាលំនឹងអ័រម៉ូន។ ការយល់ដឹងពីយន្តការជីវសាស្ត្រឱ្យបានត្រឹមត្រូវនឹងជួយឱ្យស្ត្រីកាត់បន្ថយសម្ពាធផ្លូវចិត្ត និងបង្កើនភាពជឿជាក់ក្នុងជីវិតផ្លូវភេទ ជាជាងការផ្ដោតលើការព្រួយបារម្ភដែលមិនមានមូលដ្ឋានវេជ្ជសាស្ត្រច្បាស់លាស់។
ប្រសិនបើមានរោគសញ្ញាមិនធម្មតាដូចជា ការលេចនោម ឬអារម្មណ៍ថាសាច់ដុំទ្វារមាសធ្លាក់ចុះខ្លាំង ការពិគ្រោះជាមួយគ្រូពេទ្យជំនាញគឺជាជម្រើសដ៏ល្អបំផុតដើម្បីទទួលបានការវាយតម្លៃ និងការព្យាបាលឱ្យបានត្រឹមត្រូវតាមបច្ចេកទេស៕