យោងតាមការចុះផ្សាយពីប្រភពបរទេស ការជ្រើសរើសសាច់ជ្រូកសម្រាប់អាហារប្រចាំថ្ងៃមិនត្រឹមតែមើលលើតម្លៃថោកនោះទេ ព្រោះការធ្វេសប្រហែសតែមួយនាទីអាចនាំឱ្យអ្នកទិញសាច់ដែលមានមេរោគ ឬសារធាតុគីមីមកបំផ្លាញសុខភាពគ្រួសារយ៉ាងធ្ងន់ធ្ងរ។
សញ្ញាព្រមានដំបូងដែលត្រូវប្រុងប្រយ័ត្នគឺពណ៌សាច់ខុសប្រក្រតី ដោយសាច់ដែលល្អត្រូវមានពណ៌ផ្កាឈូកស្រស់ ប៉ុន្តែប្រសិនបើឃើញសាច់មានពណ៌ក្រហមក្រមៅ ស្វាយ ឬមានស្នាមអុជៗពណ៌ប្រផេះ វាគឺជាសញ្ញានៃការរលួយ និងឆ្លងមេរោគដែលសូម្បីតែការចម្អិនក្នុងកម្ដៅខ្ពស់ក៏មិនអាចសម្លាប់មេរោគទាំងនោះអស់ដែរ។ បន្ថែមលើនេះ អ្នកគួរចៀសវាងសាច់ដែលមានដុំពកតូចៗនៅម្ដុំសាច់ក ឬសាច់ស្មា ព្រោះវាគឺជាក្រពេញកូនកណ្ដុរដែលជាកន្លែងសំបូរទៅដោយបាក់តេរី វីរុស និងកាកសំណល់ពុលរបស់ជ្រូក ដែលបង្កសម្ពាធខ្លាំងដល់ប្រព័ន្ធភាពស៊ាំរបស់មនុស្ស។
ក្លិន និងសណ្ឋានសាច់ក៏ជាកត្តាសំខាន់ដែលមិនអាចរំលងបាន ប្រសិនបើអ្នកធុំក្លិនជូរ ក្លិនគីមីខ្លាំង ឬក្លិនស្អុយរលួយដែលគេព្យាយាមបិទបាំងដោយការលាងទឹកថ្នាំ ត្រូវចៀសឱ្យឆ្ងាយជាបន្ទាន់ព្រោះវាអាចបង្កជាជាតិពុលសន្សំក្នុងថ្លើម និងតម្រងនោម។ ក្រៅពីនេះ ត្រូវពិនិត្យមើលសណ្ឋានសាច់ដែលគេចាក់ទឹកដើម្បីបង្កើនទម្ងន់ ដែលមានសភាពសើមជោក គ្មានភាពយឺតដិត ឬសាច់ដែលប្រើសារធាតុហានធ័រឱ្យមើលទៅរឹងមាំខុសធម្មតា ដែលសារធាតុទាំងនេះគឺជាភ្នាក់ងារបង្កជំងឺមហារីកយ៉ាងសាហាវ។
ដើម្បីសុវត្ថិភាពខ្ពស់ អ្នកគួរទិញសាច់នៅកន្លែងដែលមានការត្រួតពិនិត្យច្បាស់លាស់ ចៀសវាងទិញសាច់ដែលគេកិនស្រាប់ដែលងាយនឹងលាយសាច់កាកសំណល់ និងគួរប្រើវិធីសាស្ត្រមើល ហិត និងស្ទាបឱ្យបានដិតដល់បំផុតមុននឹងសម្រេចចិត្តទិញយកមកចម្អិនជាអាហារសម្រាប់មនុស្សជាទីស្រឡាញ់៕