យោងតាមការចុះផ្សាយពីប្រភពបរទេស ម៉ាស៊ីនបោកគក់គឺជាជំនួយការដ៏ពូកែក្នុងការសន្សំសំចៃពេលវេលា ប៉ុន្តែការដាក់របស់គ្រប់យ៉ាងចូលទៅក្នុងម៉ាស៊ីនដោយមិនបានត្រួតពិនិត្យ អាចជាកំហុសដ៏ធ្ងន់ធ្ងរដែលធ្វើឱ្យខូចខាតទាំងសម្ភារៈ និងឧបករណ៍។
ដើម្បីចៀសវាងបញ្ហា “ចំណេញមិនទាន់ខាត” អ្នកគួរដឹងពីរបស់ ៥ ប្រភេទដែលអ្នកជំនាញណែនាំឱ្យជៀសវាងបោកក្នុងម៉ាស៊ីន។ របស់ដំបូងដែលត្រូវប្រុងប្រយ័ត្នបំផុត គឺខោអាវទ្រនាប់ និងសម្លៀកបំពាក់ធ្វើពីក្រណាត់សូត្រ ឬប៉ាក់ ព្រោះកម្លាំងបង្វិលខ្លាំងអាចធ្វើឱ្យវារហែក ឬយារបាត់ទ្រង់ទ្រាយ ខណៈដែលដែកក្នុងអាវទ្រនាប់អាចរបូតមកជាប់ក្នុងធុងបោកបង្កឱ្យមានការខូចខាត។ បន្ថែមលើនេះ សម្លៀកបំពាក់ដែលមានខ្សែរ៉ូត ឬទំពក់ដែកស្រួចៗ ក៏ជាសត្រូវដែលមិនគួរមើលរំលង ព្រោះវាអាចឆ្កូតធុងបោក ឬទាក់ដាច់សម្លៀកបំពាក់ដទៃទៀត ដែលវិធីល្អបំផុតគឺអ្នកត្រូវអូសខ្សែរ៉ូតឱ្យជិត រួចបកខោអាវទៅខាងក្នុងមុននឹងបោក។
របស់ទី៣ ដែលមិនគួរដាក់ចូលម៉ាស៊ីន គឺស្បែកជើង ជាពិសេសស្បែកជើងស្បែក ឬស្បែកជើងដែលមានបាតរឹង ព្រោះវាអាចបាត់បង់ទ្រង់ទ្រាយ និងបង្កឱ្យមានការប៉ះទង្គិចខ្លាំងដល់ធុងបោក។ ចំពោះភួយដែលមានទំហំធំពេកធៀបនឹងចំណុះម៉ាស៊ីន ក៏ជាមូលហេតុចម្បងដែលធ្វើឱ្យម៉ាស៊ីនបោកមិនស្អាត ញ័រខ្លាំង និងឆាប់ខូចម៉ូទ័រយ៉ាងរហ័ស។ ចុងក្រោយ គឺសម្លៀកបំពាក់ដែលជាប់ដីខ្សាច់ ឬរោមសត្វច្រើនពេក ដែលប្រសិនបើមិនបានសម្អាតចេញជាមុនទេ វានឹងធ្វើឱ្យស្ទះទុយោបង្ហូរទឹក និងឆ្កូតផ្ទៃធុងបោកខាងក្នុង។
ដើម្បីឱ្យម៉ាស៊ីនបោកគក់ដំណើរការបានល្អ និងមានអាយុកាលវែង អ្នកគួរចេះបែងចែកប្រភេទក្រណាត់ កម្រិតភាពកខ្វក់ និងពណ៌ឱ្យបានត្រឹមត្រូវ រួមទាំងការសម្អាតម៉ាស៊ីនជាប្រចាំ ដែលការយកចិត្តទុកដាក់បន្តិចបន្តួចនេះ នឹងជួយឱ្យអ្នកចំណេញថវិកា និងរក្សាសោភណភាពសម្លៀកបំពាក់បានយូរអង្វែង៕