យោងតាមការចុះផ្សាយពីប្រភពបរទេស បច្ចុប្បន្ន ជំងឺដាច់សរសៃឈាមខួរក្បាលលែងជាជំងឺរបស់អ្នកមានអាយុច្រើនទៀតហើយ ប៉ុន្តែវាកំពុងកើតមានលើមនុស្សវ័យក្មេងកាន់តែច្រើនគួរឱ្យព្រួយបារម្ភ។
កំហុសឆ្គងដ៏ធំបំផុតមួយគឺការជឿតាមព័ត៌មានមិនច្បាស់លាស់ថា ការញ៉ាំ “ដំឡូងជ្វា” រាល់ថ្ងៃអាចជួយ “លាងសម្អាតសរសៃឈាម” ឬការពារជំងឺនេះបាន ១០០%។ ការពិត ដំឡូងជ្វាគឺជាអាហារល្អ ប៉ុន្តែវាមិនមែនជា “ថ្នាំទិព្វ” ដែលអាចលុបលាងទម្លាប់អាក្រក់ដូចជាការញ៉ាំប្រៃ ញ៉ាំជាតិខ្លាញ់ច្រើន ការសេពគ្រឿងស្រវឹង ឬការជក់បារីបានឡើយ។
ដើម្បីការពារខ្លួនពីជំងឺដាច់សរសៃឈាមខួរក្បាលឱ្យមានប្រសិទ្ធភាព អ្នកជំនាញណែនាំឱ្យងាកមកផ្តោតលើរបបអាហារចម្រុះជាជាងការញ៉ាំអាហារតែមួយមុខ។ អាហារសំខាន់ៗដែលគួរមានក្នុងរបបអាហាររួមមាន បន្លែបៃតងចាស់ (សម្បូរជាតិប៉ូតាស្យូមជួយទប់សម្ពាធឈាម) គ្រាប់ធញ្ញជាតិដែលមិនទាន់សម្រិតសម្រាំង (ជួយគ្រប់គ្រងជាតិស្ករ) សាច់ត្រី (មានអូមេហ្គា-៣ ការពារជញ្ជាំងសរសៃឈាម) រួមជាមួយពពួកសណ្តែក និងផ្លែឈើស្រស់ៗ។ លើសពីនេះ ការកាត់បន្ថយជាតិអំបិលមកនៅត្រឹមក្រោម ៥ ក្រាមក្នុងមួយថ្ងៃ ការធ្វើលំហាត់ប្រាណឱ្យបានទៀងទាត់ ១៥០ នាទីក្នុងមួយសប្តាហ៍ និងការគេងឱ្យបានគ្រប់គ្រាន់ គឺជាខែលការពារដ៏រឹងមាំបំផុត។
សរុបមក អ្វីដែលគួរឱ្យខ្លាចបំផុតនៃជំងឺដាច់សរសៃឈាមខួរក្បាល មិនមែនជាការកើតឡើងភ្លាមៗនោះទេ ប៉ុន្តែគឺ “ភាពប្រហែស” យូរអង្វែងរបស់បុគ្គលម្នាក់ៗ។ កុំរំពឹងលើ “អព្ភូតហេតុ” ពីអាហារតែមួយមុខដូចជាដំឡូងជ្វា ប៉ុន្តែត្រូវចាប់ផ្តើមផ្លាស់ប្តូរទម្លាប់រស់នៅ និងការញ៉ាំឱ្យបានត្រឹមត្រូវតាំងពីថ្ងៃនេះ ដើម្បីសុខភាពសរសៃឈាមខួរក្បាល និងបេះដូងរបស់អ្នក៕