យោងតាមការចុះផ្សាយពីប្រភពបរទេស ទឹកត្រីគឺជាគ្រឿងទេសមិនអាចខ្វះបាន ប៉ុន្តែការដាក់ទឹកត្រីខុសពេលវេលាអាចធ្វើឱ្យបាត់បង់ក្លិនក្រអូប រសជាតិឆ្ងាញ់ និងវីតាមីនដែលមានក្នុងនោះ។ ដើម្បីឱ្យម្ហូបអាហារមានរសជាតិឆ្ងាញ់ពិសា និងរក្សាបាននូវគុណតម្លៃអាហារូបត្ថម្ភ លោកអ្នកគួរយល់ដឹងពីបច្ចេកទេសប្រើប្រាស់ទឹកត្រីទៅតាមប្រភេទមុខម្ហូបនីមួយៗ។
ជាទូទៅ លោកអ្នកគួរដាក់ទឹកត្រីនៅដំណាក់កាលចុងក្រោយបង្អស់នៃរបបចម្អិន ពោលគឺប្រហែល ១ ទៅ ២ នាទីមុននឹងបិទចង្ក្រាន។ ការធ្វើបែបនេះជួយការពារកុំឱ្យជាតិអាស៊ីតអាមីណូក្នុងទឹកត្រីរលាយបាត់បង់ដោយសារកម្ដៅខ្លាំងក្នុងរយៈពេលយូរ។ ចំពោះមុខម្ហូបស៊ុប សម្ល ឬឡៅ ការដាក់ទឹកត្រីនៅពេលទឹកកំពុងពុះខ្លាំងជិតលើកចុះ នឹងជួយឱ្យក្លិនឈ្ងុយនៅជាប់ក្នុងសម្លបានល្អ។ ចំណែកមុខម្ហូបខសាច់ ឬត្រី អ្នកអាចបែងចែកជាពីរដំណាក់កាល គឺដាក់ប្រឡាក់ម្ដងដើម្បីឱ្យចូលជាតិ និងដាក់បន្ថែមបន្តិចទៀតនៅពេលជិតឆ្អិន ដើម្បីបង្កើនក្លិនឈ្ងុយ និងពណ៌សម្បុរឱ្យកាន់តែទាក់ទាញ។
ក្រៅពីពេលវេលា លោកអ្នកក៏គួរជ្រើសរើសទឹកត្រីដែលមានគុណភាពខ្ពស់ និងមានកម្រិតប្រូតេអ៊ីនត្រឹមត្រូវ ដើម្បីធានាបាននូវសុវត្ថិភាពសុខភាព។ ការប្រើប្រាស់ទឹកត្រីក្នុងបរិមាណសមល្មម និងការលាយបញ្ចូលគ្នាជាមួយគ្រឿងទេសផ្សេងៗដូចជា ស្ករ ខ្ទឹមម្ទេស ឬក្រូចឆ្មារ នឹងជួយឱ្យមុខម្ហូបរបស់អ្នកកាន់តែមានតុល្យភាពរសជាតិ និងគួរឱ្យចង់ទទួលទានបំផុត៕