យោងតាមការចុះផ្សាយពីប្រភពបរទេស សក់ស្កូវមុនអាយុមិនមែនកើតឡើងដោយចៃដន្យឡើយ ប៉ុន្តែវាជាសញ្ញាព្រមានពីកត្តាតំណពូជ សម្ពាធផ្លូវចិត្ត ការសម្រាកមិនគ្រប់គ្រាន់ និងការបំផ្លាញពីជាតិគីមី ឬបារីដែលធ្វើឱ្យកោសិកាពណ៌សក់ចុះខ្សោយ។
ចំណុចដែលគួរប្រយ័ត្នបំផុតគឺទម្លាប់ដកសក់ស្កូវ ព្រោះការដកម្តងៗគឺជាការបំផ្លាញវដ្តជីវិតរបស់សរសៃសក់ ដែលអាចធ្វើឱ្យខូចឫសសក់រហូតដល់ទំពែកក្បាលជាកង់ៗ ហើយសក់ដែលដុះមកថ្មីក៏នៅតែមានពណ៌សដដែល។ ដើម្បីទប់ស្កាត់បញ្ហានេះ លោកអ្នកគួរផ្ដោតលើការញ៉ាំអាហារដែលសម្បូរជាតិដែក ប្រូតេអ៊ីន ស័ង្កសី និងវីតាមីន B ដើម្បីចិញ្ចឹមឫសសក់ឱ្យរឹងមាំ រួមជាមួយវីតាមីន C ដើម្បីជួយដល់ការស្រូបយកជីវជាតិបានល្អ។
ការចូលគេងឱ្យបានលឿន កាត់បន្ថយគ្រឿងស្រវឹង និងការថែទាំសុខភាពផ្លូវចិត្ត គឺជាគន្លឹះដ៏សំខាន់បំផុតក្នុងការថែរក្សាពណ៌សក់ឱ្យនៅខ្មៅរលោង និងរក្សាភាពក្មេងខ្ចីបានយូរអង្វែង៕