យោងតាមការចុះផ្សាយពីប្រភពបរទេស វាគឺជាការពិតដ៏គួរឱ្យភ្ញាក់ផ្អើលមួយដែលបុរសសម័យថ្មីជាច្រើនខិតខំហាត់ប្រាណថែរក្សារាងឱ្យមាំមួន ប៉ុន្តែបែរជាជួបបញ្ហាមេជីវិតខ្សោយទៅវិញ ដែលបញ្ហានេះកើតចេញពីទម្លាប់រស់នៅប្រចាំថ្ងៃដែលយើងតែងមើលរំលង។
មូលហេតុចម្បងបំផុតគឺការធ្វើឱ្យកើនឡើងកម្ដៅនៅតំបន់ពងស្វាសតាមរយៈការស្លៀកខោរឹបពេក ការងូតទឹកក្ដៅញឹកញាប់ ឬការដាក់ Laptop លើភ្លៅធ្វើការយូរៗ ដែលសកម្មភាពទាំងនេះរារាំងដល់ដំណើរការផលិតមេជីវិតដែលមានសុខភាពល្អ។ ក្រៅពីនេះ ការប្រើប្រាស់បារី និងគ្រឿងស្រវឹង ការចូលគេងយប់ជ្រៅដោយសារការលេងទូរស័ព្ទ និងសម្ពាធការងារ ក៏ជាកត្តាបំផ្លាញអ័រម៉ូនបុរស និងធ្វើឱ្យមេជីវិតចុះខ្សោយទាំងបរិមាណ និងគុណភាព។ ជាពិសេសចំពោះអ្នកហាត់ប្រាណ ការលបលួចប្រើប្រាស់ថ្នាំជំនួយសាច់ដុំដើម្បីឱ្យឆាប់ឡើងសាច់ដុំ អាចធ្វើឱ្យរាងកាយឈប់ផលិតអ័រម៉ូនធម្មជាតិ រហូតឈានដល់ការរួមតូចនៃពងស្វាស និងបាត់បង់សមត្ថភាពបង្កកំណើតតែម្ដង។
ដើម្បីការពារភាពរឹងមាំពីខាងក្នុង បុរសគ្រប់រូបគួរជៀសវាងការស្លៀកពាក់រឹបពេក កាត់បន្ថយការប្រើប្រាស់ឧបករណ៍អេឡិចត្រូនិកក្បែរខ្លួន និងផ្ដោតលើការសម្រាកឱ្យបានគ្រប់គ្រាន់ រួមជាមួយរបបអាហារដែលមានតុល្យភាព៕