មហារីកមាត់ស្បូន គឺជាសត្រូវលាក់មុខទី២ ក្នុងចំណោមជំងឺមហារីកដែលយាយីជីវិតស្ត្រីកម្ពុជាបន្ទាប់ពីមហារីកដោះ។ ប៉ុន្តែ អ្វីដែលស្ត្រីគ្រប់រូបត្រូវត្រេកអរ និងត្រូវដឹងនោះគឺ «មហារីកមាត់ស្បូន ជាជំងឺដែលអាចបង្ការបាន និងអាចព្យាបាលជាសះស្បើយ» ប្រសិនបើយើងមានអាវុធការពារខ្លួនត្រឹមត្រូវ។
ខាងក្រោមនេះគឺជា «អាវុធយុទ្ធសាស្ត្រ» ៣ យ៉ាង ដើម្បីការពារខ្លួនអ្នកពីជំងឺនេះ៖
១. អាវុធមហាអំណាច ៖ ការចាក់វ៉ាក់សាំងការពារ
មូលហេតុចម្បង ៩៩% នៃមហារីកមាត់ស្បូន បណ្តាលមកពីមេរោគ HPV (Human Papillomavirus)។
-ប្រសិទ្ធភាព៖ វ៉ាក់សាំងអាចការពារមេរោគ HPV ប្រភេទបង្កគ្រោះថ្នាក់បានយ៉ាងខ្ពស់។
-ពេលវេលាមាស៖ គួរចាក់ឱ្យបានមុនពេលមានទំនាក់ទំនងផ្លូវភេទលើកដំបូង (ចាប់ពីអាយុ ៩ឆ្នាំឡើងទៅ)។ ទោះជាយ៉ាងណា ស្ត្រីដែលមានគ្រួសារហើយ ក៏នៅតែអាចចាក់បានដើម្បីបង្កើនការការពារ។
២. អាវុធយុទ្ធសាស្ត្រ៖ ការពិនិត្យកោសិកាមាត់ស្បូន
ជំងឺមហារីកមាត់ស្បូន មិនកើតឡើងភ្លាមៗក្នុងរយៈពេលមួយថ្ងៃនោះទេ វាប្រើពេលពី ៥ ទៅ ២០ឆ្នាំ ក្នុងការវិវត្តពីកោសិកាមិនធម្មតាទៅជាមហារីក។
-ការពិនិត្យទៀងទាត់៖ ការធ្វើតេស្ត Pap Smear ឬតេស្តរកមេរោគ HPV ជួយឱ្យគ្រូពេទ្យរកឃើញកោសិកាដែល «ត្រៀមនឹងក្លាយជាមហារីក»។
-ឱកាសឈ្នះ៖ បើរកឃើញក្នុងដំណាក់កាលកោសិកាមិនធម្មតា គ្រូពេទ្យអាចព្យាបាលផ្តាច់បាន ១០០% មុនពេលវាវិវត្តទៅជាមហារីក។
៣. អាវុធការពារខ្លួន៖ ការយល់ដឹងពីសញ្ញាព្រមាន
កុំរង់ចាំរហូតដល់មានការឈឺចាប់ ទើបទៅជួបគ្រូពេទ្យ។ ចូរឧស្សាហ៍សង្កេតសញ្ញាដូចជា៖
-ការធ្លាក់សខុសធម្មតា (មានក្លិនឆ្អេះ ឬមានពណ៌ប្លែក)។
-ការហូរឈាមតាមទ្វារមាសក្រោយពេលមានទំនាក់ទំនងផ្លូវភេទ។
-ការហូរឈាមមិនទៀងទាត់នៅចន្លោះពេលមករដូវ ឬក្រោយអស់រដូវ។