យោងតាមការចុះផ្សាយពីប្រភពបរទេស មនុស្សជាច្រើនយល់ច្រឡំថា សម្លៀកបំពាក់ទើបទិញថ្មីពីហាងគឺជា “របស់ស្អាត” ប៉ុន្តែការពិតនៅពីក្រោយដំណើរការផលិតអាចធ្វើឱ្យអ្នកនឹកស្មានមិនដល់។
អ្នកជំនាញក្នុងវិស័យកាត់ដេរបានបង្ហើបថា មុននឹងសម្លៀកបំពាក់មួយមកដល់ដៃអ្នក វាត្រូវឆ្លងកាត់ការកាន់ប៉ះពីមនុស្សរាប់រយនាក់ ចាប់តាំងពីដំណាក់កាលត្បាញក្រណាត់ កាត់ដេរ រហូតដល់ការវេចខ្ចប់។ អ្វីដែលកាន់តែគួរឱ្យបារម្ភគឺ ជាតិគីមីជ្រលក់ពណ៌ និងសារធាតុរក្សាសាច់ក្រណាត់ដែលត្រូវបានគេប្រើដើម្បីឱ្យខោអាវមើលទៅស្អាត មិនងាយជ្រីវជ្រួញ ប៉ុន្តែសារធាតុទាំងនេះអាចបង្កឱ្យរលាកស្បែក រមាស់ និងប្រតិកម្មផ្សេងៗ ជាពិសេសនៅពេលវាប៉ះជាមួយញើសរាងកាយ។
ក្រៅពីជាតិគីមី សម្លៀកបំពាក់ថ្មីៗក៏អាចផ្ទុកទៅដោយធូលី និងបាក់តេរីពីការរក្សាទុកនៅតាមឃ្លាំង ឬការដាក់តាំងដែលប៉ះពាល់នឹងបរិស្ថានខាងក្រៅ។ ដើម្បីការពារសុខភាពស្បែក លោកអ្នកគួរអនុវត្តតាមដំបូន្មានអ្នកជំនាញគឺ៖ ត្រូវបោកសម្អាតខោអាវថ្មីមុននឹងស្លៀកជានិច្ច។ វិធីបោកដែលល្អបំផុតគឺ គួរត្រឡប់ខោអាវផ្នែកខាងក្នុងចេញក្រៅ បោកជាមួយទឹកត្រជាក់ និងសម្ងួតក្នុងសីតុណ្ហភាពទាប ដើម្បីជម្រះជាតិគីមីដែលនៅសេសសល់ផង និងរក្សាគុណភាពសាច់ក្រណាត់ឱ្យនៅថ្មីបានយូរផង។ ការបោកសម្អាតត្រឹមតែមួយទឹកមុនស្លៀក គឺជាខែលការពារស្បែកដ៏សាមញ្ញតែមានប្រសិទ្ធភាពបំផុត៕