យោងតាមការចុះផ្សាយពីប្រភពបរទេស មនុស្សជាច្រើនតែងមានទម្លាប់ធ្វើរឿង «ស្រាលៗ» ក្រោយហូបបាយរួចដើម្បីសម្រាកកាយ ប៉ុន្តែយោងតាមអ្នកជំនាញផ្នែករំលាយអាហារ ទម្លាប់ដែលហាក់ដូចជាគ្មានគ្រោះថ្នាក់ទាំងនោះ កំពុងតែបង្កសម្ពាធយ៉ាងខ្លាំងដល់សុខភាព ជាពិសេសចំពោះមនុស្សវ័យកណ្ដាល និងមនុស្សចាស់៖
ជាដំបូងគឺ ការដើរហាត់ប្រាណភ្លាមៗ ក្រោយហូបបាយ។ ទោះបីជាមានពាក្យស្លោកថា «ដើរ ១០០ ជំហានក្រោយបាយ អាយុយឺនយូរ» ក៏ដោយ តែការពិតគឺក្រោយហូបរួច ក្រពះត្រូវការឈាមយ៉ាងច្រើនដើម្បីរំលាយអាហារ។ បើអ្នកដើរភ្លាម លំហូរឈាមនឹងត្រូវបែងចែកទៅសាច់ដុំជើង ធ្វើឱ្យក្រពះធ្វើការយឺត បង្កជាអាការហើមពោះ និងខ្វះឈាមទៅចិញ្ចឹមបេះដូងចំពោះមនុស្សចាស់។ ទីពីរគឺ ការគេងឬសម្រាកផ្អែកខ្នងភ្លាម ដែលធ្វើឱ្យជាតិអាស៊ីតក្នុងក្រពះច្រាលឡើងមកបំពង់ក បង្កជាអាការក្រហាយទ្រូង និងជូរមាត់។ ទីបីគឺ ការញ៉ាំទឹកតែខាប់ៗ ព្រោះជាតិ Tanin ក្នុងតែនឹងរារាំងការស្រូបយកជាតិដែកពីអាហារ និងធ្វើឱ្យក្រពះបញ្ចេញអាស៊ីតច្រើនជ្រុល បង្កជាជំងឺរលាកក្រពះរ៉ាំរ៉ៃ។ ចុងក្រោយគឺ ការបន្ធូរខ្សែក្រវាត់ ដើម្បីឱ្យស្រួលពោះ ព្រោះសកម្មភាពនេះធ្វើឱ្យសម្ពាធក្នុងពោះធ្លាក់ចុះភ្លាមៗ បង្កហានិភ័យនៃជំងឺ «ធ្លាក់ក្រពះ» និងធ្វើឱ្យសម្ពាធឈាមប្រែប្រួល។
ដើម្បីសុខភាពល្អ អ្នកជំនាញណែនាំឱ្យ អង្គុយសម្រាកដោយរក្សាខ្នងឱ្យត្រង់ប្រហែល ២០ ទៅ ៣០ នាទី រួចសឹមចាប់ផ្ដើមដើរតិចៗ ឬធ្វើសកម្មភាពផ្សេងៗ ទើបជាការជួយដល់ប្រព័ន្ធរំលាយអាហារឱ្យដំណើរការបានយ៉ាងប្រសើរ និងជៀសផុតពីជំងឺដង្កាត់ទាំងឡាយ៕