យោងតាមការចុះផ្សាយពីប្រភពបរទេស មករដូវមានដុំឈាមកក ឬឈាមដុំៗ គឺជាបញ្ហាដែលនារីភាគច្រើនធ្លាប់ជួបប្រទះ និងតែងតែមានក្ដីបារម្ភ។ ជាទូទៅ វាគឺជា រឿងធម្មតា ប្រសិនបើដុំឈាមនោះមានទំហំតូច ហើយកើតមានតែក្នុងអំឡុង ១ ទៅ ២ ថ្ងៃដំបូងនៃថ្ងៃមករដូវ (ថ្ងៃដែលឈាមធ្លាក់ច្រើន)។ បាតុភូតនេះកើតឡើងដោយសាររាងកាយបញ្ចេញសារធាតុរារាំងការកកឈាមមិនទាន់ ធ្វើឱ្យឈាមកកជាដុំៗមុនពេលធ្លាក់ចេញមកក្រៅ។
ទោះជាយ៉ាងណា អ្នកគួរចាប់ផ្ដើមយកចិត្តទុកដាក់ ប្រសិនបើអាការៈនេះមានសញ្ញា មិនប្រក្រតី ដូចជា៖ ដុំឈាមមានទំហំធំ (ធំជាងកាក់ដប់បាត ឬប្រហែល ២,៥ សង់ទីម៉ែត្រ) កើតមានជាប់គ្នាច្រើនខែ ត្រូវប្ដូរសំឡីអនាម័យរៀងរាល់ ១ ទៅ ២ ម៉ោងម្ដង ឬមានអាការៈឈឺចាប់ក្នុងផ្ទៃពោះខ្លាំងខុសធម្មតា។ សញ្ញាទាំងនេះអាចជារោគសញ្ញានៃអតុល្យភាពអ័រម៉ូន ដុះសាច់ក្នុងស្បូន ឬជំងឺស្រទាប់ស្បូនដុះខុសកន្លែង ដែលទាមទារឱ្យមានការពិគ្រោះជាមួយគ្រូពេទ្យជំនាញជាបន្ទាន់។
ដើម្បីថែទាំសុខភាពក្នុងអំឡុងពេលនេះ អ្នកគួរសម្រាកឱ្យបានច្រើន កាត់បន្ថយភាពតានតឹង និងញ៉ាំអាហារដែលសំបូរជាតិដែក (ដូចជា ថ្លើម ស៊ុត និងបន្លែបៃតង) ដើម្បីបំពេញជាតិឈាមដែលបាត់បង់ និងការពារអាការៈស្លេកស្លាំង៕