យោងតាមការចុះផ្សាយពីប្រភពបរទេស អាការៈរាករូសមិនត្រឹមតែធ្វើឱ្យរាងកាយបាត់បង់ជាតិទឹក និងខ្សោយអស់កម្លាំងប៉ុណ្ណោះទេ ប៉ុន្តែវាក៏ជាសញ្ញាព្រមានថាប្រព័ន្ធរំលាយអាហាររបស់អ្នកកំពុងរងការរំខានយ៉ាងខ្លាំង។
ដើម្បីឱ្យពោះវៀនឆាប់បានធូរស្បើយ អ្នកត្រូវដឹងពីរបបអាហារដែលគួរ «ជៀសវាងដាច់ខាត» រួមមាន៖ អាហារខ្លាញ់ និងរបស់បំពងដែលពិបាករំលាយ អាហារហឹរឬរសជាតិខ្លាំងដែលធ្វើឱ្យរលាកពោះវៀន ទឹកដោះគោ និងភេសជ្ជៈដែលមានជាតិកាហ្វេអ៊ីនឬអាល់កុល ដែលសុទ្ធតែជាភ្នាក់ងារជំរុញឱ្យអាការៈរាកកាន់តែធ្ងន់ធ្ងរ។ បន្លែស្រស់ និងផ្លែឈើដែលមានជាតិសរសៃខ្ពស់ ក៏គួរផ្អាកសិនដែរ ព្រោះវាធ្វើឱ្យពោះវៀនធ្វើការធ្ងន់លើសកម្រិត។
ផ្ទុយទៅវិញ ដើម្បីសង្គ្រោះប្រព័ន្ធរំលាយអាហារឱ្យឆាប់វិលត្រឡប់មកសភាពដើម អ្នកគួរជ្រើសរើសអាហារដែល «ទន់ និងងាយរំលាយ» ដូចជា បបរ ភេសជ្ជៈអេឡិចត្រូឡាយ ដើម្បីបំពេញជាតិទឹក និងជាតិរ៉ែដែលបាត់បង់។ ផ្លែចេកទុំគឺជាជំនួយការដ៏ពូកែព្រោះវាសំបូរទៅដោយប៉ូតាស្យូម ចំណែកឯស៊ុតស្ងោរ និងសាច់សុទ្ធ (គ្មានខ្លាញ់) ផ្តល់ប្រូតេអ៊ីនដែលងាយស្រូបយក។
ការញ៉ាំអាហារតិចៗតែញឹកញាប់ និងការសម្រាកឱ្យបានគ្រប់គ្រាន់ គឺជាគន្លឹះមាសដែលជួយឱ្យរាងកាយងើបឡើងវិញបានយ៉ាងឆាប់រហ័ស៕