យោងតាមការចុះផ្សាយពីប្រភពបរទេស ការមានសុខភាពល្អមិនចាំបាច់ទាមទារការហាត់ប្រាណធ្ងន់ៗរាប់ម៉ោងនៅកន្លែងហាត់ប្រាណនោះទេ ព្រោះការ “ដើរ” យ៉ាងទៀងទាត់ត្រឹមតែ ៣០ នាទីក្នុងមួយថ្ងៃ គឺគ្រប់គ្រាន់នឹងបង្កើតថាមពលវិជ្ជមានយ៉ាងខ្លាំងក្លាដល់រាងកាយ ចាប់តាំងពីប្រព័ន្ធឈាមរត់រហូតដល់កោសិកាខួរក្បាល។
បើតាមទិន្នន័យសុខភាពសកល ការផ្លាស់ប្តូរធំៗចំនួន ៣ ដែលនឹងកើតឡើងចំពោះអ្នករួមមាន៖ ទីមួយគឺសុខភាពបេះដូង និងប្រព័ន្ធឈាមរត់នឹងរឹងមាំជាងមុន ដោយការដើរលឿនជួយបញ្ចុះសម្ពាធឈាម និងកាត់បន្ថយហានិភ័យនៃជំងឺដាច់សរសៃឈាមខួរក្បាលយ៉ាងមានប្រសិទ្ធភាព។ ទីពីរ គឺជួយពង្រឹងដង់ស៊ីតេឆ្អឹង និងភាពបត់បែននៃសន្លាក់ ដែលជាខែលការពារជំងឺពុកឆ្អឹង និងកាត់បន្ថយការឈឺចាប់សាច់ដុំក្នុងរយៈពេលវែង។ និងទីបី គឺការជួយ “រីសិត” ខួរក្បាលឱ្យស្រឡះ បង្កើនការចងចាំ និងកាត់បន្ថយភាពតានតឹងផ្នែកស្មារតីបានយ៉ាងប្រសើរ។
ដើម្បីទទួលបានអត្ថប្រយោជន៍ជាអតិបរមា និងសុវត្ថិភាព អ្នកគួរអនុវត្តតាមច្បាប់សាមញ្ញៗដូចជា៖ កម្តៅសាច់ដុំមុនពេលចាប់ផ្ដើម ជ្រើសរើសស្បែកជើងកីឡាដែលស័ក្តិសមដើម្បីការពារជង្គង់ ញ៉ាំទឹកឱ្យបានទៀងទាត់ និងត្រូវចេះស្ដាប់សញ្ញាព្រមានពីរាងកាយដោយឈប់សម្រាកភ្លាមប្រសិនបើមានអាការៈវិលមុខ។ ការផ្លាស់ប្តូរដ៏មាននិរន្តរភាព ចាប់ផ្ដើមពីជំហានងាយៗដែលអ្នកអាចធ្វើបានរាល់ថ្ងៃនៅថ្ងៃនេះ៕