យោងតាមការចុះផ្សាយពីប្រភពបរទេស បុកល្ហុងជាម្ហូបពេញនិយមដែលសម្បូរទៅដោយបន្លែអមជាច្រើនមុខ ប៉ុន្តែអ្នកជំនាញបានព្រមានថា បន្លែខ្លះបើញ៉ាំឆៅក្នុងបរិមាណច្រើនពេក អាចបង្កជាផលវិបាកដល់រាងកាយដោយស្មានមិនដល់។
សណ្ដែកកួរឆៅដែលយើងនិយមញ៉ាំមានផ្ទុកសារធាតុដែលអាចបង្កឱ្យហើមពោះ ណែនពោះ ឬរាករូសចំពោះអ្នកដែលមានប្រព័ន្ធរំលាយអាហារខ្សោយ ខណៈដែលស្ពៃក្ដោបឆៅមានសារធាតុ ដែលអាចរំខានដល់មុខងារក្រពេញទីរ៉ូអ៊ីត និងសារធាតុដែលបង្កើនហានិភ័យនៃជំងឺក្រួសក្នុងតម្រងនោម ប្រសិនបើញ៉ាំជាប់ជាប្រចាំ។ ចំពោះសណ្ដែកបណ្ដុះវិញ បញ្ហាសំខាន់គឺការចម្លងមេរោគបាក់តេរីដោយសារការដុះក្នុងបរិយាកាសសើម ដែលងាយនឹងបង្កឱ្យមានអាការៈពុលចំណីអាហារ ប្រសិនបើលាងសម្អាតមិនបានស្អាតល្អ។ រីឯបន្លែដែលគ្រោះថ្នាក់បំផុតនោះគឺទំពាំងឆៅ ដែលមានផ្ទុកសារធាតុម្យ៉ាងអាចបង្កឱ្យមានអាការៈចង់ក្អួត វិលមុខ និងប៉ះពាល់ដល់ប្រព័ន្ធរំលាយអាហារ ដូច្នេះទំពាំងត្រូវតែឆ្លងកាត់ការស្ងោរឱ្យឆ្អិនល្អជាមុនសិនទើបមានសុវត្ថិភាព។
ដើម្បីញ៉ាំបុកល្ហុងឱ្យមានសុខភាពល្អ អ្នកគួរញ៉ាំបន្លែឱ្យមានភាពចម្រុះ ជៀសវាងការញ៉ាំបន្លែដដែលៗក្នុងបរិមាណច្រើនជ្រុល និងត្រូវប្រាកដថាបន្លែទាំងនោះត្រូវបានលាងសម្អាតយ៉ាងត្រឹមត្រូវ ដើម្បីរក្សាបាននូវភាពឆ្ងាញ់ពិសាផង និងសុវត្ថិភាពយូរអង្វែងផង៕