យោងតាមការចុះផ្សាយពីប្រភពបរទេស ម្នាស់គឺជាផ្លែឈើដ៏មានឱជារស ប៉ុន្តែសំណួរដែលមនុស្សជាច្រើនឆ្ងល់គឺ «តើគួរញ៉ាំវានៅពេលណាទើបទទួលបានប្រយោជន៍បំផុត?»។
តាមពិតទៅ ពេលវេលាដែលល្អបំផុតសម្រាប់ការញ៉ាំម្នាស់គឺ ក្រោយពេលបាយ ព្រោះវាសម្បូរទៅដោយអង់ស៊ីមដែលជួយបំបែកជាតិប្រូតេអ៊ីន និងសម្រួលដល់ប្រព័ន្ធរំលាយអាហារបានយ៉ាងអស្ចារ្យ។ លើសពីនេះ ការញ៉ាំក្រោយអាហារជួយកាត់បន្ថយការរលាកក្រពះ និងពន្យារការបឺតស្រូបជាតិស្ករចូលទៅក្នុងឈាមលឿនពេកផងដែរ។
ទោះជាយ៉ាងណា អ្នកមិនគួរញ៉ាំម្នាស់ពេលពោះទទេឡើយ ជាពិសេសនៅពេលព្រឹក ព្រោះជាតិអាស៊ីតរបស់វាអាចបង្កឱ្យមានអាការៈក្រហាយក្រពះ ឬរំខានដល់មាត់ធ្មេញ ជាពិសេសអ្នកដែលមានជំងឺច្រាលទឹកអាស៊ីតក្រពះ។ ចំពោះបរិមាណជាតិស្ករ ម្នាស់មានជាតិស្ករធម្មជាតិក្នុងកម្រិតមធ្យម ដូច្នេះអ្នកគួរញ៉ាំក្នុងបរិមាណសមល្មម (ប្រហែលមួយចានតូចក្នុងមួយថ្ងៃ) និងជៀសវាងការជ្រលក់អំបិលស្ករបន្ថែម។
ការជ្រើសរើសញ៉ាំម្នាស់ស្រស់ជាជាងម្នាស់កំប៉ុង ឬម្នាស់កែច្នៃ គឺជាវិធីសាស្ត្រដ៏ល្អបំផុតដើម្បីទទួលបានវីតាមីនពេញលេញ និងរក្សាសុខភាពឱ្យរឹងមាំ៕