ការប្រើទឹកកក មកស្អំលើផ្ទៃមុខ មិនមែនជារឿងថ្មីស្រឡាងនោះទេ ប៉ុន្តែវាគឺជាអាថ៌កំបាំងសម្រស់ដ៏សាមញ្ញ និងមានប្រសិទ្ធភាពបំផុតដែលតារាល្បីៗជាច្រើនតែងតែអនុវត្ត។ ប្រសិនបើអ្នកមិនទាន់បានដឹងពីអត្ថប្រយោជន៍ដ៏មហាសាលនៃដុំទឹកកកតូចៗទាំងនេះទេ ខាងក្រោមនេះគឺជាហេតុផលដែលអ្នកគួរចាប់ផ្តើមសាកល្បងនៅព្រឹកនេះ៖
១. បង្រួមរន្ធញើសឱ្យតូចឆ្មារ
ទឹកកកគឺជា ថ្នាំបង្រួមរន្ធញើសធម្មជាតិដ៏អស្ចារ្យ ។ នៅពេលអ្នកស្អំទឹកកកលើមុខ ភាពត្រជាក់នឹងធ្វើឱ្យរន្ធញើសដែលរីកធំរួមតូចមកវិញភ្លាមៗ ។ វាមិនត្រឹមតែធ្វើឱ្យស្បែកមើលទៅរលោងប៉ុណ្ណោះទេ ប៉ុន្តែថែមទាំងជួយទប់ស្កាត់ការកកស្ទះធូលីដី និងខ្លាញ់ ដែលជាដើមហេតុនៃមុនក្បាលខ្មៅផងដែរ។
២. កាត់បន្ថយការហើមមុខ និងរង្វង់ភ្នែកខ្មៅ
តើអ្នកធ្លាប់ភ្ញាក់ពីគេងមកមានអាការៈហើមភ្នែក ឬហើមមុខដែរឬទេ? ការស្អំទឹកកកជួយសម្រួលដល់ចរន្តឈាម និងកាត់បន្ថយការដក់ជាតិទឹកនៅក្រោមស្បែក។ វាជួយឱ្យភ្នែកដែលហើមរបស់អ្នកត្រឡប់មកមានភាពស្រស់ថ្លាវិញក្នុងរយៈពេលត្រឹមតែប៉ុន្មាននាទីប៉ុណ្ណោះ។
៣. ជួយឱ្យស្បែកមានពន្លឺ និងភ្លឺថ្លា
ភាពត្រជាក់ពីទឹកកកជួយជម្រុញឱ្យចរន្តឈាមរត់បានស្រួលទៅកាន់ផ្ទៃមុខ។ នៅពេលឈាមរត់បានល្អ ស្បែករបស់អ្នកនឹងទទួលបានអុកស៊ីសែនកាន់តែច្រើន ដែលធ្វើឱ្យផ្ទៃមុខមានពណ៌ស៊ីជម្ពូ និងមានពន្លឺចេញពីខាងក្នុងដោយធម្មជាតិ។
៤. ពន្យារភាពចាស់ និងបំបាត់ស្នាមជ្រីវជ្រួញ
ការប្រើទឹកកកជាប្រចាំ ជួយឱ្យស្បែកមុខមានភាពតឹងណែន (Firming)។ វាជួយកាត់បន្ថយការលេចចេញនូវស្នាមជ្រីវជ្រួញតូចៗ និងជួយទាញស្បែកដែលយារធ្លាក់ឱ្យរឹងមាំឡើងវិញ។ វាប្រៀបដូចជាការធ្វើ Facial Lift បែបធម្មជាតិនៅផ្ទះដូច្នោះដែរ។
៥. បំបាត់ការរលាក និងហើមក្រហមនៃមុន
ប្រសិនបើអ្នកមានមុនដែលកំពុងហើមក្រហម និងឈឺ ចូរប្រើទឹកកកខ្ចប់នឹងក្រណាត់ស្អាតមកស្អំលើវា។ ទឹកកកនឹងជួយកាត់បន្ថយការរលាក ធ្វើឱ្យមុនឆាប់ស្រក និងបាត់បង់ការឈឺចាប់បានយ៉ាងឆាប់រហ័ស។
របៀបអនុវត្តឱ្យមានសុវត្ថិភាព និងប្រសិទ្ធភាព៖
-កុំស្អំផ្ទាល់៖ កុំយកដុំទឹកកកមកដាក់លើស្បែកមុខដោយផ្ទាល់ពេក ព្រោះភាពត្រជាក់ខ្លាំងពេកអាចធ្វើឱ្យខូចកោសិកាស្បែក (Ice Burn)។ គួរខ្ចប់វាជាមួយក្រណាត់ស្ដើង និងទន់មួយជាន់សិន។
-ចលនាជារង្វង់៖ ម៉ាស្សាថ្នមៗជារង្វង់លើផ្ទៃមុខ ប្រហែល ២ ទៅ ៣ នាទី។
-បង្កើនប្រសិទ្ធភាព៖ អ្នកអាចបង្កកទឹកកកដែលធ្វើពី ទឹកដោះគោ, ទឹកសណ្តែក, ឬទឹកត្រសក់ ដើម្បីទទួលបានវីតាមីនបន្ថែមសម្រាប់ស្បែក។
មិនបាច់ចំណាយលុយច្រើនលើផលិតផលថ្លៃៗឡើយ! ត្រឹមតែដុំទឹកកកមួយដុំនៅក្នុងទូរទឹកកករបស់អ្នក ក៏អាចជួយឱ្យផ្ទៃមុខស្អាត រលោង និងក្មេងជាងវ័យបានដែរ។