ថ្លើម គឺជារោងចក្រចម្រាញ់ជាតិពុល ដ៏ធំបំផុតនៅក្នុងរាងកាយរបស់យើង ។ វាបំពេញតួនាទីជាង ៥០០ យ៉ាង រាប់ចាប់ពីការបន្សាបជាតិពុល ការផលិតទឹកប្រមាត់ រហូតដល់ការផ្ទុកថាមពល។ ប៉ុន្តែថ្លើមគឺជាសរីរាង្គដែលអត់ធ្មត់បំផុត វាមិនងាយនឹងបញ្ចេញការឈឺចាប់ឡើយ លុះត្រាតែវាខូចខាតដល់ទៅ៧០% ទៅ ៨០% ទើបវាចាប់ផ្តើមបង្ហាញរោគសញ្ញា ។
ខាងក្រោមនេះគឺជាសញ្ញាព្រមាន និងវិធីថែរក្សាថ្លើមឱ្យមានសុខភាពល្អ ដែលអ្នកមិនគួរមើលរំលង៖
១. សញ្ញាព្រមានដំបូង៖ តើថ្លើមរបស់អ្នកកំពុងស្រែកប្រាប់អ្វីខ្លះ?
កុំចាំទាល់តែមានការឈឺចាប់ខ្លាំង ទើបចាប់ផ្តើមបារម្ភ។ ចូរសង្កេតសញ្ញាទាំងនេះ៖
-អាការៈលឿង: ស្បែក និងគ្រាប់ភ្នែកឡើងពណ៌លឿង ដែលបណ្តាលមកពីការកកស្ទះសារធាតុប៊ីលីរុយប៊ីន (Bilirubin) ក្នុងឈាម។
-អស់កម្លាំងរ៉ាំរ៉ៃ៖ អ្នកមានអារម្មណ៍ថាអស់កម្លាំងខ្លាំង ទោះបីជាសម្រាកគ្រប់គ្រាន់ក៏ដោយ ព្រោះថ្លើមលែងមានសមត្ថភាពផ្ទុក និងបញ្ចេញថាមពលបានល្អ។
-ទឹកនោមពណ៌ក្រម៉ៅ និងលាមកពណ៌ស្លេក៖ នេះជាសញ្ញាបញ្ជាក់ថា ប្រព័ន្ធបញ្ចេញចោលជាតិប្រមាត់កំពុងមានបញ្ហា។
-ហើមពោះ និងហើមជើង៖ ការចុះខ្សោយនៃថ្លើមនាំឱ្យមានការកកស្ទះជាតិទឹក (Ascites) ដែលធ្វើឱ្យពោះរីកធំ និងហើមជើង។
-រមាស់ស្បែក៖ ការកកស្ទះជាតិពុលក្នុងឈាម អាចបណ្តាលឱ្យស្បែកមានអាការៈរមាស់ខុសធម្មតា ទោះបីជាគ្មានកន្ទួលក៏ដោយ។
-ងាយជាំ ឬហូរឈាម៖ នៅពេលថ្លើមខ្សោយ វាមិនអាចផលិតប្រូតេអ៊ីនសម្រាប់ជួយឱ្យឈាមកកបានគ្រប់គ្រាន់ឡើយ។
២. វិធីការពារ និងថែទាំថ្លើមឱ្យរឹងមាំ
ការការពារ ប្រសើរជាងការព្យាបាល”។ អ្នកអាចជួយថ្លើមរបស់អ្នកបានតាមរយៈទម្លាប់ងាយៗ៖
+ ជ្រើសរើសរបបអាហារ
-បន្លែបៃតង និងផ្លែឈើ៖ បន្លែដូចជា ខាត់ណាខៀវ និងផ្លែឈើដែលមានជាតិជូរ (ក្រូចឆ្មារ ក្រូចពោធិ៍សាត់) ជួយជម្រុញការបន្សាបជាតិពុល។
-កាត់បន្ថយស្ករ និងខ្លាញ់អាក្រក់៖ ស្ករលើសកម្រិតនាំឱ្យមាន “ខ្លាញ់រុំថ្លើម” ដែលជាជំហានដំបូងនៃជំងឺរលាកថ្លើមរ៉ាំរ៉ៃ។
+ កាត់បន្ថយគ្រឿងស្រវឹង និងបារី
-គ្រឿងស្រវឹងគឺជាសត្រូវលេខ ១ របស់ថ្លើម។ ការទទួលទានច្រើនហួសកម្រិតនឹងបំផ្លាញកោសិកាថ្លើម និងបង្កជាស្លាកស្នាម (ក្រិនថ្លើម)។
+ប្រយ័ត្នប្រយែងក្នុងការប្រើប្រាស់ថ្នាំ
-ការប្រើប្រាស់ថ្នាំបំបាត់ការឈឺចាប់ ឬថ្នាំផ្សេងៗលើសកម្រិត (ជាពិសេសប្រភេទ Acetaminophen/Paracetamol) អាចធ្វើឱ្យថ្លើមខូចខាតភ្លាមៗ។ ត្រូវពិគ្រោះជាមួយគ្រូពេទ្យជានិច្ច។
+ចាក់វ៉ាក់សាំងការពារ
-ការចាក់វ៉ាក់សាំងការពារជំងឺរលាកថ្លើមប្រភេទ A និង B គឺជាខែលការពារដ៏រឹងមាំបំផុតសម្រាប់សុខភាពថ្លើមរបស់អ្នក។