យោងតាមការចុះផ្សាយពីប្រភពបរទេស ការញ៉ាំភេសជ្ជៈផ្អែមដូចជាទឹកក្រូចកំប៉ុង ភេសជ្ជៈពង្រឹងកម្លាំង និងកាហ្វេថែមស្ករជាប្រចាំ គឺជាឫសគល់នៃជំងឺធាត់ដុះក្បាល ទឹកនោមផ្អែម និងបង្កើនហានិភ័យនៃជំងឺបេះដូងយ៉ាងធ្ងន់ធ្ងរ។
ជាតិស្ករខ្ពស់នៅក្នុងភេសជ្ជៈទាំងនេះនឹងទៅជំរុញកម្រិតអាំងស៊ុយលីនក្នុងឈាមឱ្យហក់ឡើងខ្លាំង បង្កើនជាតិខ្លាញ់អាក្រក់ និងបង្កជាកំណកកំបោរក្នុងសរសៃឈាមដែលនាំឱ្យរួមតូច និងខូចខាតដល់ប្រព័ន្ធរបត់ឈាមទាំងមូល។ តាមការសិក្សាបានបង្ហាញថា អ្នកដែលញ៉ាំភេសជ្ជៈផ្អែមចាប់ពី ២ កែវឡើងទៅក្នុងមួយថ្ងៃ មានហានិភ័យស្លាប់ដោយសារជំងឺបេះដូង ឬដាច់សរសៃឈាមខួរក្បាលខ្ពស់ជាងអ្នកមិនសូវញ៉ាំដល់ទៅមួយភាគបី។
ដើម្បីការពារសុខភាព អ្នកគួរកម្រិតការញ៉ាំជាតិស្ករឱ្យទាបជាង ១០% នៃកាឡូរីសរុបប្រចាំថ្ងៃ ហើយប្ដូរមកញ៉ាំទឹកស្អាត ទឹកដោះគោរុក្ខជាតិ ឬទឹកផ្លែឈើស្រស់ដែលមិនបន្ថែមស្ករជំនួសវិញ ដើម្បីរក្សាតុល្យភាពរាងកាយ និងការពារបេះដូងឱ្យរឹងមាំបានយូរអង្វែង៕