តិចនិកមាសសម្រាប់អ្នកការិយាល័យ៖ វិធីទប់ទល់នឹងភាពស្រពោន និងថែសម្រស់ឱ្យចាំ

យោងតាមការចុះផ្សាយពីប្រភពបរទេស តើអ្នកធ្លាប់ឆ្ងល់ទេថា ហេតុអ្វីបានជាចូលធ្វើការទើបតែបានពីរបីម៉ោង សម្រស់របស់អ្នកបែរជាមើលទៅហាក់ដូចជាហត់នឿយ និងស្រពោនខ្លាំង?

បាតុភូតនេះត្រូវបានគេហៅថា “Office Air Theory” ដែលអ្នកជំនាញបានរកឃើញថា បញ្ហាមិនមែនមកពីផ្ទៃមុខរបស់អ្នកប្រែប្រួលនោះទេ ប៉ុន្តែគឺមកពីមជ្ឈដ្ឋានជុំវិញខ្លួន។ ខ្យល់អាកាសក្នុងបន្ទប់ម៉ាស៊ីនត្រជាក់ដែលស្ងួត និងវិលវល់ ខ្វះជាតិសំណើម រួមផ្សំជាមួយកម្រិតកាបូនឌីអុកស៊ីតខ្ពស់ និងពន្លឺអំពូលហ្វ្លុយអូរីសង់​ដែលបញ្ចេញកាំរស្មី UV តិចតួច សុទ្ធតែជាសត្រូវបំផ្លាញស្បែក ភ្នែក និងសក់របស់អ្នកឱ្យមើលទៅស្លេកស្លាំង និងគ្មានជីវជាតិ។

ដើម្បីរក្សាសម្រស់ឱ្យនៅតែស្រស់ស្អាតទោះបីជាត្រូវអង្គុយក្នុងការិយាល័យពេញមួយថ្ងៃក៏ដោយ អ្នកគួរអនុវត្តតិចនិកងាយៗមួយចំនួន៖

ការផ្ដល់សំណើមគឺជាចំណុចសំខាន់បំផុត ដោយអ្នកគួរប្រើឡេផ្ដល់សំណើមលាបលើស្បែកដែលនៅមានជាតិទឹកតិចៗ ដើម្បីរក្សាសំណើមឱ្យបានយូរ និងអាចប្រើស្ប្រាយបាញ់មុខ​ឬម៉ាស៊ីនបញ្ចេញចំហាយទឹកតូចៗនៅលើតុធ្វើការ។ សម្រាប់សក់ដែលឆាប់ជំពាក់ ឬសំពោង អ្នកអាចប្រើសេរ៉ូម ឬប្រេងអាហ្គង់​លាបនៅចុងសក់ និងជ្រើសរើសសម្លៀកបំពាក់ដែលធ្វើពីសាច់ក្រណាត់ធម្មជាតិដូចជា កប្បាស ឬសូត្រ ដើម្បីឱ្យស្បែកងាយដកដង្ហើម។ បន្ថែមពីនេះ កុំភ្លេចលាបឡេថែរក្សាដៃ និងបបូរមាត់ឱ្យបានញឹកញាប់ ព្រោះវាជាផ្នែកដែលងាយនឹងស្ងួតខ្លាំងបំផុត។

អ្វីដែលពិសេសបំផុតនោះគឺ ការឆ្លៀតពេលសម្រាកដើរទៅស្រូបយកខ្យល់អាកាសបរិសុទ្ធនៅខាងក្រៅខ្លះ នឹងជួយឱ្យស្មារតី និងសម្រស់របស់អ្នករស់រវើកឡើងវិញភ្លាមៗ៕