យោងតាមការចុះផ្សាយពីប្រភពបរទេស អយស្ទ័រ គឺជាកំពូលអាហារដែលសម្បូរទៅដោយវីតាមីន សារធាតុស័ង្កសី អាស៊ីតខ្លាញ់អូមេហ្គា-៣ និងកូឡេស្តេរ៉ុល ដែលផ្ដល់អត្ថប្រយោជន៍យ៉ាងខ្លាំងដល់ទាំងមនុស្សពេញវ័យ និងកុមារ ជាពិសេសបុរស។
សារធាតុស័ង្កសីដែលមានក្នុងអាហារនេះ ខ្ពស់ជាងអាហារដទៃទៀតពី ៦ ទៅ ១០ ដង ដែលវាដើរតួយ៉ាងសំខាន់ក្នុងការរក្សាតុល្យភាពអ័រម៉ូនតេស្តូស្តេរ៉ូន បង្កើនគុណភាពមេជីវិត និងជំរុញសុខភាពផ្លូវភេទបុរសឱ្យកាន់តែប្រសើរ។
ទោះជាយ៉ាងណា ការញ៉ាំ “ឆៅ” មិនមែនជាជម្រើសល្អបំផុតឡើយ។ ដោយសារពួកវាជាអាហារសមុទ្ររស់នៅតាមបាតភក់ វាផ្ទុកទៅដោយបាក់តេរី និងមេរោគដែលមកពីការបំពុលបរិស្ថាន។ ការញ៉ាំឆៅមិនបានផ្ដល់ជីវជាតិច្រើនជាងការចម្អិនឆ្អិននោះទេ តែផ្ទុយទៅវិញ វាបង្កហានិភ័យខ្ពស់នៃការឆ្លងមេរោគ និងការពុលអាហារ។ ដើម្បីសុវត្ថិភាព អ្នកគួរត្រាំពួកវាក្នុងទឹកស្អាត ឬទឹកអំបិលប្រហែល ៣ ម៉ោង ដើម្បីជម្រះដី និងភាពកខ្វក់ចេញឱ្យអស់មុននឹងយកទៅចម្អិនឱ្យឆ្អិនល្អ។
អ្វីដែលត្រូវប្រុងប្រយ័ត្នបំផុតនោះគឺ “កុំញ៉ាំច្រើនហួសប្រមាណ”។ ការញ៉ាំច្រើនពេក ឬញ៉ាំញឹកញាប់ពេក អាចបណ្ដាលឱ្យលើសសារធាតុស័ង្កសី ដែលបង្កជាអាការៈចង់ក្អួត ឈឺពោះ រាករូស និងធ្វើឱ្យចុះខ្សោយប្រព័ន្ធការពាររាងកាយ។ លើសពីនេះ ជាតិកូឡេស្តេរ៉ុលខ្ពស់នៅក្នុងពួកវា ក៏អាចបង្កហានិភ័យដល់ជំងឺសរសៃឈាមបេះដូង សម្ពាធឈាម និងគ្រោះថ្នាក់សរសៃឈាមខួរក្បាលផងដែរ។
ការញ៉ាំក្នុងបរិមាណសមល្មម និងចម្អិនឱ្យឆ្អិន គឺជាវិធីសាស្ត្រវៃឆ្លាតបំផុតដើម្បីទទួលបានសុខភាពមាំមួន និងសុវត្ថិភាពយូរអង្វែង៕