យោងតាមការចុះផ្សាយពីប្រភពបរទេស មូលហេតុដែលធ្វើឱ្យពងទាស្ងោរផ្ដល់អារម្មណ៍ឆ្អែតបានយូរជាងពងទាចៀន គឺស្ថិតនៅលើវត្តមាននៃជាតិខ្លាញ់ និងដំណើរការរំលាយអាហាររបស់រាងកាយ។ ការចៀនពងដោយប្រើប្រេងមិនត្រឹមតែបង្កើនកាឡូរីប៉ុណ្ណោះទេ ប៉ុន្តែវាក៏ទៅជំរុញអ័រម៉ូនឃ្លានដែលធ្វើឱ្យអ្នកចង់ញ៉ាំបន្តទៀត ខណៈដែលពងស្ងោរផ្ដល់ប្រូតេអ៊ីនសុទ្ធជួយជំរុញអ័រម៉ូនឆ្អែតឱ្យធ្វើការបានល្អ។
ម្យ៉ាងវិញទៀត ពងស្ងោរត្រូវបានរាងកាយរំលាយដោយយឺតៗ និងទៀងទាត់ ដែលជួយរក្សាកម្រិតស្ករក្នុងឈាមឱ្យនៅថេរ ផ្ទុយពីពងចៀនដែលច្រើនតែញ៉ាំជាមួយបាយស ឬអាហារមានជាតិម្សៅខ្ពស់ បណ្ដាលឱ្យកម្រិតស្ករក្នុងឈាមឡើងចុះលឿនដែលនាំឱ្យឆាប់ឃ្លានខ្លាំងភ្លាមៗ។ ដូច្នេះសម្រាប់អ្នកដែលចង់គ្រប់គ្រងទម្ងន់ ឬចង់ឆ្អែតបានយូរ ការជ្រើសរើសពងស្ងោរញ៉ាំជាមួយបន្លែដែលមានជាតិសរសៃខ្ពស់ គឺជាវិធីសាស្ត្រដ៏មានប្រសិទ្ធភាពបំផុតក្នុងការរក្សាសុខភាព និងរូបរាងឱ្យនៅស្វែលស្អាត៕