យោងតាមការចុះផ្សាយពីប្រភពបរទេស ការញ៉ាំឪឡឹកនៅពេលយប់មិនមែនជាមូលហេតុផ្ទាល់ដែលធ្វើឱ្យអ្នកធាត់នោះទេ ព្រោះឪឡឹក ១០០ ក្រាម ផ្ដល់ថាមពលត្រឹមតែ ៣០ កាឡូរីប៉ុណ្ណោះ និងមានជាតិទឹកខ្ពស់ដែលជួយឱ្យរាងកាយស្រស់ស្រាយ។ ទោះជាយ៉ាងណា អ្វីដែលគួរប្រុងប្រយ័ត្នគឺបរិមាណដែលអ្នកញ៉ាំ ព្រោះឪឡឹកមានជាតិស្ករធម្មជាតិ ប្រសិនបើញ៉ាំច្រើនជ្រុលក្នុងពេលដែលរាងកាយមិនសូវមានសកម្មភាពបញ្ចេញថាមពល ជាតិស្ករដែលលើសអាចនឹងបំប្លែងទៅជាខ្លាញ់បង្កឱ្យឡើងទម្ងន់បាន។
លើសពីនេះ ដោយសារឪឡឹកសម្បូរទៅដោយជាតិទឹក ការញ៉ាំវានៅជិតពេលចូលគេងពេកអាចធ្វើឱ្យអ្នកក្រោកមកបត់ជើងតូចញឹកញាប់នៅពាក់កណ្ដាលអាធ្រាត្រ ដែលរំខានដល់ដំណេក និងធ្វើឱ្យស្មារតីមិនសូវស្រឡះនៅពេលព្រឹក។ ដើម្បីញ៉ាំឪឡឹកដោយសុវត្ថិភាព និងមិនបារម្ភរឿងរូបរាង អ្នកគួរញ៉ាំក្នុងបរិមាណសមល្មមត្រឹមតែ ១ ទៅ ២ ចំណិត និងគួរញ៉ាំមុនពេលចូលគេងយ៉ាងតិច ១ ទៅ ២ ម៉ោង ដើម្បីឱ្យរាងកាយមានពេលគ្រប់គ្រាន់ក្នុងការរំលាយ និងបញ្ចេញចោលនូវជាតិទឹកដែលលើស៕