យោងតាមការចុះផ្សាយពីប្រភពបរទេស ការធ្វើលំហាត់ប្រាណមិនចាំបាច់ទាល់តែទៅហាត់នៅក្លឹបហាត់ប្រាណឱ្យបែកញើសជោកទើបមានប្រសិទ្ធភាពនោះទេ។ សម្រាប់អ្នកដែលមានពេលវេលាតិច ឬមិនចង់ហាត់ប្រាណបែបលោតដែលនាំឱ្យឈឺជង្គង់ “ការដើរ” គឺជាជម្រើសដ៏ល្អបំផុត។ ប៉ុន្តែតើត្រូវដើរបែបណា ទើបអាចកម្ចាត់ខ្លាញ់ក្បាលពោះ និងដុតរំលាយថាមពលបានច្រើនជាងមុន ២ ដង?
ខាងក្រោមនេះគឺជាតិចនិកងាយៗ ៥ យ៉ាង ដើម្បីបំប្លែងការដើរធម្មតា ឱ្យទៅជាការដុតរំលាយខ្លាញ់កម្រិតខ្ពស់៖
អាថ៌កំបាំងដំបូងគេគឺ ការដើរប្ដូរល្បឿន។ ជំនួសឱ្យការដើរក្នុងល្បឿនដដែលៗថេរជានិច្ច អ្នកគួរដើរឱ្យលឿនបំផុតក្នុងរយៈពេល ១ នាទី រួចត្រឡប់មកដើរក្នុងល្បឿនធម្មតាវិញរយៈពេល ២ នាទី រួចធ្វើបែបនេះឆ្លាស់គ្នា។ វិធីនេះជួយជំរុញអត្រាចង្វាក់បេះដូងឱ្យឡើងខ្ពស់ ដែលធ្វើឱ្យរាងកាយដុតរំលាយកាឡូរីបានច្រើនជាងការដើរធម្មតាទ្វេដង និងជួយកាត់បន្ថយខ្លាញ់សន្សំក្នុងក្បាលពោះបានយ៉ាងពូកែ។ បន្ទាប់មកគឺ ការគ្រវីដៃជួយបញ្ជូនកម្លាំង។ អ្នកគួរបត់កែងដៃឱ្យបានមុំ ៩០ ដឺក្រេ ហើយគ្រវីដៃចេញពីស្មាឱ្យស្របតាមចង្វាក់ជំហានជើង។ ការធ្វើបែបនេះមិនត្រឹមតែជួយឱ្យរាងកាយប្រើប្រាស់ថាមពលកាន់តែច្រើនប៉ុណ្ណោះទេ ប៉ុន្តែថែមទាំងជួយហាត់សាច់ដុំខ្នង និងស្មា កាត់បន្ថយអាការការិយាល័យទៀតផង។
តិចនិកដ៏សំខាន់មួយទៀតដែលមនុស្សជាច្រើនមើលរំលងគឺ ការហ្មឺតពោះរាល់ពេលដើរ។ ក្នុងអំឡុងពេលដើរ អ្នកគួរព្យាយាមហ្មឺតពោះបន្តិច និងកន្ត្រាក់សាច់ដុំពោះឱ្យជាប់ជានិច្ច ដែលវិធីនេះនឹងជួយឱ្យសាច់ដុំពោះត្រូវបានប្រើប្រាស់ដោយផ្ទាល់ ធ្វើឱ្យក្បាលពោះឆាប់រាបស្មើ និងជួយទប់លំនឹងខ្នងមិនឱ្យឈឺពេលដើរយូរ។ ជាមួយគ្នានេះ អ្នកគួរ ដើរជំហានខ្លីៗតែញាប់ ជាជាងការខំឈានជើងឱ្យវែងៗ ព្រោះការឈានវែងពេកអាចបង្កផលប៉ះពាល់ដល់សន្លាក់ជង្គង់ និងធ្វើឱ្យឆាប់ហត់។ ការដើរជំហានល្មមតែបង្កើនភាពញឹកញាប់នៃជំហាន នឹងជួយជំរុញប្រព័ន្ធដុតរំលាយអាហារឱ្យធ្វើការធ្ងន់ជាងមុន ដោយមិនធ្វើឱ្យប៉ះពាល់ដល់សន្លាក់ឆ្អឹងឡើយ។
ជាចុងក្រោយ ប្រសិនបើអ្នកចង់បង្កើនការប្រកួតប្រជែងឱ្យរាងកាយ អ្នកអាច ជ្រើសរើសផ្លូវដែលមានចំណោត ឬការដើរឡើងទួល។ ការដើរឡើងចំណោតជួយឱ្យសាច់ដុំត្រកៀក និងសាច់ដុំភ្លៅធ្វើការខ្លាំង ដែលនាំឱ្យបាត់បង់ថាមពលកាន់តែច្រើន។ ការដើរសម្រកក្បាលពោះគឺជាវិធីសាស្ត្រដែលងាយស្រួល និងមាននិរន្តរភាពបំផុត។ គ្រាន់តែអនុវត្តតាមតិចនិកទាំង ៥ នេះជារៀងរាល់ថ្ងៃ មិនថាពេលសម្រាកថ្ងៃត្រង់ ឬក្រោយចេញពីធ្វើការ អ្នកនឹងឃើញលទ្ធផលប្លែកគួរឱ្យភ្ញាក់ផ្អើល៕