ឈប់ញ៉ាំទាំងមិនដឹង! បញ្ជីបន្លែដែលមានជីវជាតិទាបបំផុត តែមនុស្សភាគច្រើនបែរជានិយមញ៉ាំដើម្បីសម្រកទម្ងន់ទៅវិញ

យោងតាមការចុះផ្សាយពីប្រភពបរទេស នៅពេលនិយាយពីការញ៉ាំសាលាដ ឬប៊ឺហ្គ័រ មនុស្សភាគច្រើនតែងតែនឹកឃើញដល់ “សាលាដស្រួយ” ​ដែលមានសភាពស្រស់ និងស្រួយឆ្ងាញ់គួរឱ្យចង់ញ៉ាំ។

មនុស្សជាច្រើនជឿថាការញ៉ាំបន្លែប្រភេទនេះក្នុងបរិមាណច្រើន នឹងជួយឱ្យសម្រកទម្ងន់បានរហ័ស និងជួយដល់សុខភាពពោះវៀន។ ប៉ុន្តែតាមពិតទៅ ទិន្នន័យអាហារូបត្ថម្ភបានបង្ហាញថា បន្លែប្រភេទនេះគឺជាបន្លែដែលមាន “ជីវជាតិទាបបំផុត” ក្នុងចំណោមក្រុមបន្លែស្លឹកបៃតង ដែលស្ទើរតែមិនផ្តល់ប្រយោជន៍ដល់ប្រព័ន្ធរំលាយអាហារដូចអ្វីដែលយើងរំពឹងទុកនោះទេ។

តាមការបកស្រាយរបស់អ្នកជំនាញ សមាសធាតុលើសពី ៩០% នៃសាលាដស្រួយ គឺមានតែ “ទឹក” ប៉ុណ្ណោះ។ ទោះបីជាវាមានកាឡូរីទាបដែលមើលទៅហាក់ដូចជាល្អសម្រាប់អ្នកសម្រកទម្ងន់ ប៉ុន្តែវាមានជាតិសរសៃ ​តិចតួចបំផុត ដែលមិនគ្រប់គ្រាន់សម្រាប់ចិញ្ចឹមបាក់តេរីល្អៗនៅក្នុងពោះវៀនឡើយ។ ដូច្នេះ ការញ៉ាំតែសាលាដស្រួយតែមួយមុខដើម្បីសង្ឃឹមថានឹងជួយឱ្យប្រព័ន្ធបញ្ចេញចោលដើរស្រួល ឬទទួលបានវីតាមីនខ្ពស់ គឺជារឿងដែល “មិនសូវមានប្រសិទ្ធភាព” នោះទេ។ បើប្រៀបធៀបជាមួយបន្លែពួយឡេង ឬខាត់ណា បន្លែសាលាដស្រួយនេះចាញ់ដាច់ទាំងផ្នែកវីតាមីន A, វីតាមីន C, ជាតិដែក និងជាតិសរសៃ។

ទោះជាយ៉ាងណា នេះមិនមែនមានន័យថាវាគ្មានប្រយោជន៍ទាល់តែសោះនោះទេ ប៉ុន្តែអ្នកគួរតែដឹងពី “តិចនិកការញ៉ាំឱ្យឆ្លាតវៃ” ដើម្បីទទួលបានសុខភាពល្អពិតប្រាកដ។ អ្នកជំនាញបានណែនាំថា អ្នកគួរប្រើសាលាដស្រួយនេះជា “បន្លែបន្ទាប់បន្សំ” ដើម្បីបង្កើនរសជាតិស្រួយឆ្ងាញ់ប៉ុណ្ណោះ ប៉ុន្តែមិនគួរចាត់ទុកវាជាប្រភពជីវជាតិចម្បងក្នុងចានអាហារឡើយ។ អ្វីដែលសំខាន់បំផុត គឺអ្នកគួរញ៉ាំវាលាយជាមួយបន្លែស្លឹកបៃតងចាស់ៗផ្សេងទៀត និងគួរញ៉ាំអមជាមួយ “ខ្លាញ់ល្អ” ដូចជាផ្លែបឺរ ឬប្រេងអូលីវ ដើម្បីជួយឱ្យរាងកាយស្រូបយកវីតាមីនដែលរលាយក្នុងខ្លាញ់បានកាន់តែប្រសើរ។ ការជ្រើសរើសញ៉ាំបន្លែឱ្យបានចម្រុះមុខ គឺជាគន្លឹះដ៏ត្រឹមត្រូវក្នុងការសម្រកទម្ងន់ និងថែទាំសុខភាពឱ្យមានគុណភាពជានិរន្តរ៍​៕