យោងតាមការចុះផ្សាយពីប្រភពរទេស អាការៈឈឺខ្នងអាចជារឿងធម្មតាដែលកើតឡើងលើមនុស្សគ្រប់គ្នា ប៉ុន្តែអ្នកត្រូវចេះសង្កេតឱ្យច្បាស់ ព្រោះការឈឺខ្នងខ្លះមិនមែនមកពីការហត់នឿយសាច់ដុំឡើយ តែវាជាសញ្ញាគ្រោះថ្នាក់នៃជំងឺក្រួសក្នុងតម្រងនោម។
ប្រសិនបើអ្នកឈឺខ្នងបែបតឹងៗ ចំកណ្ដាលខ្នងផ្នែកខាងក្រោម ឈឺនៅចំណុចជាក់លាក់ដែលចុចទៅឃើញឈឺ ហើយអាការៈនេះធូរស្រាលទៅវិញនៅពេលអ្នកបានសម្រាក ឬហាត់ពត់ពន្យឺតសាច់ដុំ នោះគ្រាន់តែជាការឈឺសាច់ដុំធម្មតាដែលបណ្ដាលមកពីការលើករបស់ធ្ងន់ ឬអង្គុយខុសទម្រង់តែប៉ុណ្ណោះ។
ផ្ទុយទៅវិញ ប្រសិនបើអ្នកមានអាការៈឈឺចុកចាប់យ៉ាងខ្លាំងនៅម្ខាងនៃចង្កេះ ឬផ្នែកចំហៀងខ្នង (មិនមែនចំកណ្ដាលខ្នង) ហើយការឈឺនោះមានលក្ខណៈចុកមួលៗមកដល់ពោះផ្នែកខាងក្រោម ឬក្រលៀន នោះគឺជាសញ្ញាច្បាស់លាស់នៃជំងឺក្រួសក្នុងតម្រងនោម។ អ្វីដែលគួរឱ្យកត់សម្គាល់បំផុតនោះគឺ ទោះបីជាអ្នកព្យាយាមផ្លាស់ប្តូរឥរិយាបថ ឬសម្រាកយ៉ាងណាក៏មិនបាត់ឈឺដែរ ហើយជារឿយៗវាអាចមកជាមួយអាការៈបន្ទោបង់ស្អិត នោមមានឈាម ចង់ក្អួត ឬមានគ្រុនក្ដៅថែមទៀតផង។ ដើម្បីបង្ការហានិភ័យនេះ អ្នកគួរទម្លាប់ញ៉ាំទឹកឱ្យបានគ្រប់គ្រាន់ កាត់បន្ថយអាហារប្រៃ និងជៀសវាងការទប់នោមយូរ។ ប្រសិនបើអ្នកជួបប្រទះការឈឺចាប់ខ្លាំងដែលមិនធ្លាប់មានពីមុនមក រួមជាមួយការប្រែប្រួលនៃទឹកនោម អ្នកត្រូវប្រញាប់ទៅជួបគ្រូពេទ្យជាបន្ទាន់ ព្រោះក្រួសក្នុងតម្រងនោមមិនមែនជាបញ្ហាតូចតាចដែលអាចទុកយូរបានឡើយ៕