យោងតាមការចុះផ្សាយពីប្រភពបរទេស មនុស្សភាគច្រើនតែងតែឱ្យតម្លៃលើរសជាតិអាហារអាំង និងបំពងថាមានឱជារសឆ្ងាញ់ជាងគេ ប៉ុន្តែបើនិយាយពីការរក្សាសារធាតុចិញ្ចឹមវិញ តើវិធីសាស្ត្រមួយណាដែលឈ្នះគេ? ការយល់ដឹងពីរបៀបចម្អិនឱ្យបានត្រឹមត្រូវ គឺជាគន្លឹះដ៏សំខាន់សម្រាប់សុខភាពគ្រួសារអ្នក។
ក្នុងចំណោមវិធីសាស្ត្រចម្អិនទាំងអស់ ការ “ចំហុយ” ត្រូវបានចាត់ទុកថាជាវិធីដ៏វិសេសបំផុត។ ការចំហុយប្រើប្រាស់ចំហាយទឹកក្ដៅដើម្បីធ្វើឱ្យអាហារឆ្អិន ដែលវិធីនេះជួយរក្សាបានទាំងរសជាតិដើម ពណ៌សម្បុរ និងជាពិសេសគឺវីតាមីន និងសារធាតុរ៉ែមិនឱ្យបាត់បង់ទៅណាឡើយ។ ខុសពីការ “ស្ងោរ” ដែលធ្វើឱ្យសារធាតុចិញ្ចឹមសំខាន់ៗរលាយចូលទៅក្នុងទឹកអស់ ធ្វើឱ្យអាហារដែលយើងញ៉ាំបាត់បង់តម្លៃអាហារូបត្ថម្ភយ៉ាងច្រើន។
លើសពីនេះ អាហារចំហុយមិនតម្រូវឱ្យយើងប្រើប្រាស់ប្រេង ឬខ្លាញ់ដូចជាការឆា ឬបំពងនោះទេ ដែលវាជាជម្រើសដ៏ល្អបំផុតសម្រាប់អ្នកចង់គ្រប់គ្រងទម្ងន់ និងការពារជំងឺសរសៃឈាមបេះដូង។ ផ្ទុយទៅវិញ ការ “បំពង ឬចៀន” ក្នុងសីតុណ្ហភាពខ្ពស់ មិនត្រឹមតែធ្វើឱ្យអាហារសម្បូរទៅដោយខ្លាញ់ដែលនាំឱ្យលើសទម្ងន់ប៉ុណ្ណោះទេ ប៉ុន្តែវាក៏អាចបង្កើតជាសារធាតុគីមីម្យ៉ាងដែលបង្កជាជំងឺមហារីក និងធ្វើឱ្យប្រព័ន្ធរំលាយអាហារដំណើរការពិបាកទៀតផង។
សរុបមក ប្រសិនបើអ្នកចង់ទទួលបានជីវជាតិពេញលេញពីបន្លែ ត្រី ឬសាច់ ការចំហុយគឺជាជម្រើសលេខមួយ។ ការបន្ថែមមុខម្ហូបចំហុយទៅក្នុងរបបអាហារប្រចាំថ្ងៃ គឺជាការវិនិយោគលើសុខភាពដ៏ឈ្លាសវៃបំផុត ដើម្បីឱ្យរាងកាយទទួលបាននូវថាមពល និងវីតាមីនគ្រប់គ្រាន់៕